Мәскеу. 7 қазан. ИНТЕРФАКС – Ормуз бұғазы арқылы мұнай тасымалының шектелуі Ирак экспортына кері әсер етіп, ел экономикасына қысым түсірді. Осыған байланысты Ирак билігі ұлттық валютаның АҚШ долларына шаққандағы бағамын 13%-ға төмендетті.
Ирак Орталық банкі халыққа доллар сату бағамын бұрынғы 1320 динардан 1520 динарға көтерді. Бұл туралы сәрсенбі күні елдің Қаржы министрлігі хабарлады.
Bloomberg агенттігінің мәліметінше, ақпан айының соңында АҚШ пен Израильдің Иранға қарсы соғысы басталғалы бері Парсы шығанағы елдерінің ішінде ұлттық валютасын алғаш рет Ирак әлсіретіп отыр. Өңірдегі мемлекеттердің басым бөлігі өз валюталарының бағамын АҚШ долларына байланыстырады.
Ирак экономикасы әлемдегі мұнай секторына ең тәуелді экономикалардың бірі саналады. Иран Ормуз бұғазы арқылы өтетін кемелерге шабуыл жасай бастағаннан кейін елдің мұнай экспорты күрт қысқарды. Бұл бағыт Ирак пен Парсы шығанағындағы өзге мемлекеттердің мұнайын сыртқы нарыққа шығаруда шешуші маңызға ие.
Bloomberg бағалауынша, наурыз айының басынан бері Ирак тәулігіне орта есеппен шамамен 1,25 млн баррель мұнай экспорттаған. Былтыр бұл көрсеткіш тәулігіне 3,5 млн баррельге жуық болған. Ирактың мемлекеттік мұнай сату компаниясы SOMO өткен айда қақтығыс басталғалы елдің шығыны 80 млрд долларға жеткенін хабарлады.
«Бұған дейінгі мұнай нарығындағы әрбір дағдарыс Ирак экономикасына ауыр әсер етті. 2008, 2014 және 2020 жылдары да солай болды. 2026 жылы Ормуз бұғазының жабылуы мен мұнайдан түсетін кірістің тоқтауы тағы бір осындай кезеңге айналды. Бағдат мемлекеттік қызметкерлердің жалақысын төлеу мен динар бағамын ұстап тұрудың бірін таңдауға мәжбүр болды. Билік бірінші бағытты таңдады», – деді Bloomberg-тің дамушы нарықтар жөніндегі бас экономисі Зиад Дауд.
Халықаралық валюта қорының болжамынша, биыл Ирактың жалпы ішкі өнімі шамамен 7%-ға қысқарады.
Соңғы екі айда Ирактың мұнай экспорты біршама артқанымен, соғысқа дейінгі деңгейге әлі жеткен жоқ.
