Мәскеу. 7 қазан. ИНТЕРФАКС – Кремль сейсенбі күні Францияның ядролық оқтұмсықсыз M51.3 баллистикалық зымыранын ұшыруын Франция президенті Эмманюэль Макрон айтқандай «айқын әрі анық белгі» деп қабылдады. Алайда кез келген мәселені күш көрсету мақсатындағы зымыран ұшыру арқылы емес, келіссөз жолымен шешкен дұрыс деп санайды. Бұл туралы Ресей президентінің баспасөз хатшысы Дмитрий Песков мәлімдеді.
«Мұны айқын әрі анық белгі ретінде қабылдаймыз. Оның (Макронның – ИФ) өзі қалай айтса, біз де солай бағалаймыз», – деді Песков журналистердің сұрағына жауап бере отырып.
«Кез келген мәселені зымыран ұшырып күш көрсету арқылы емес, келіссөз арқылы шешу керек деп есептейміз», – деді ол.
Песковтың айтуынша, Еуропа «экономикалық бірлестік болып саналатын Еуропалық одақты милитаризациялап, оны әскери-саяси одаққа айналдыру жоспарына барынша ден қойып отыр». Оның сөзінше, мұндай жағдайда ЕО қызметі экономикалық, әскери және әскери-саяси бағыттарды қамтитын болады.
«Бұл – теріс үрдіс. Өйткені олар қорғаныс пен қауіпсіздік саласындағы саясатын Ресей Федерациясымен текетіреске негіздеп құрып жатыр. Мұндай жолдың болашағы жоқ. Тарих көрсеткендей, оның соңы жақсылыққа апармайды», – деді Песков.
Сонымен қатар ол Ресей мұндай жоспарлар мен әрекеттердің барлығын бақылап отырғанын айтты.
«Президент бұл туралы бірнеше рет айтқан. Біз ұлттық қауіпсіздігімізді стратегиялық деңгейде қамтамасыз ету үшін қажетті шаралардың бәрін қабылдап жатырмыз. Сонымен бірге Президент бұған дейін де бірнеше рет атап өткендей, біз келіссөзге ашықпыз», – деді Песков.
