ҚР Ішкі істер министрлігінің хабарлауынша, ведомство көлік құралдарын тіркеу және оларды басқару құқығын алу үшін емтихан тапсыру қағидаларына өзгерістер әзірледі.
«Біздің мақсатымыз – мемлекеттік қызметтерді алу тәртібін жеңілдетіп, оған кететін уақытты қысқарту. Осыған байланысты артық рәсімдер алынып тасталады.
Көлік құралының құрылымына өзгерістер енгізілгеннен кейін оны бөлек тексеруден өткізу талап етілмейді. Енгізілген өзгерістердің қауіпсіздігін растайтын құжат болса жеткілікті.
Емтиханды алғашқы мүмкіндікте тапсыра алмаған азаматтар келесі жұмыс күні қайта тапсыра алады. Екінші рет өте алмаған жағдайда дайындалуға 10 күнтізбелік күн беріледі. Теориялық немесе практикалық емтиханнан үш рет өте алмаған үміткерлер тиісті емтиханды одан әрі ақылы негізде тапсырады. Бұл шара жүргізуші куәлігін алуға ниетті азаматтардың емтиханға тыңғылықты дайындалып келуіне бағытталған.
Сонымен қатар практикалық емтиханнан өте алмаған жағдайда теориялық емтиханның оң нәтижесі бұрынғыдай жойылмайды», – делінген министрлік хабарламасында.
Еуразия24 пікірі:
Адамдардың күнделікті тіршілігін жеңілдететін кез келген өзгерісті оң қадам деп қабылдаймыз. Алайда көлік жүргізуге қатысты талаптарды жеңілдеткенде шектен шықпау аса маңызды.
Қазақстанда жол-көлік оқиғалары көп тіркеледі. 2025 жылы елде 36 мыңнан астам жол апаты болып, 2,3 мыңнан астам адам қаза тапқан.
Көлік министрлігінің мәліметінше (https://www.gov.kz/org/transport/press/news/details/1268801?lang=ru ), жол апаттарының 91 пайызы жол қозғалысы ережелерін өрескел бұзудан болған. Ең жиі кездесетін заңбұзушылықтардың қатарында жылдамдықты шамадан тыс арттыру, көліктер арасындағы қауіпсіз арақашықтықты сақтамау және жол белгілерінің талаптарын елемеу бар. Мұның бәрі жүргізушілердің дайындығы мен жолдағы тәртібіне тікелей байланысты.
Біздіңше, жүргізуші куәлігін алуға үміткер азамат теориялық емтиханнан бірнеше рет қатарынан өте алмаса, бұл Ішкі істер министрлігін ойландыруы тиіс. Мұндай адамның көлік тізгініне отырып, жалпыға ортақ жолдарға шығуға дайындығы жеткілікті ме?
Біздің ойымызша, осындай жағдайларда үміткерлерді оқытқан автомектептердің жұмысына да назар аударылуы керек. Ал теориялық емтиханды қайта тапсыруды ақылы қызметке айналдырумен ғана шектелу мәселені шешпейді. Өйткені мұндай тәртіп білімінде олқылықтары бар азаматтардың да ерте ме, кеш пе емтиханнан өтіп, көлік жүргізуіне жол ашуы мүмкін. Бұл өз кезегінде жол қозғалысының өзге қатысушыларына елеулі қауіп төндіреді.
