14 қазанда алдымен әлеуметтік желілерде, кейін ресми бұқаралық ақпарат құралдарында Алматыдағы Республикалық физика-математика мектебінің оқушылары жаппай ауруханаға түскені туралы ақпарат тарады. Артынша бұл жағдайды Денсаулық сақтау министрлігі де растады. Жедел ішек инфекциясына күдікпен 48 бала ауруханаға жатқызылып, дәрігерлердің бақылауына алынды. Тағы бірнеше оқушы сақтық шарасы ретінде мектеп интернатында оқшауланды.
Оқиғадан кейін Денсаулық сақтау министрлігі «Master Food» ЖШС-нің ас блогына тексеру жүргізіп, азық-түлікті сақтау, дайын тағамдардан тәуліктік сынама алу және тамақтандыруды ұйымдастыру талаптарының бұзылғанын анықтады.
«Инфекцияның қайдан тарағанын анықтау үшін су мен азық-түлік өнімдерінен сынамалар алынды, түрлі беткейлерден сүртінділер жиналды, ас блогының қызметкерлері тексерілді. Зертханалық зерттеулер жалғасып жатыр. Тексеру нәтижесінде бес қаулы шығарылды. Оларға сәйкес, мектеп пен асхананың жұмысы уақытша тоқтатылып, жекелеген тағамдарды сатуға тыйым салынды, уақытша санитариялық шаралар енгізілді. Сондай-ақ қажетті ілеспе құжаттары жоқ сүт өнімдері тәркіленді», – делінген Денсаулық сақтау министрлігінің хабарламасында.
Ведомствоның мәліметінше, ауруханаға жатқызылған балалардың барлығының жағдайы тұрақты. Ешқайсысы жансақтау бөлімінің көмегіне мұқтаж емес.
Республикалық физика-математика мектебінің ас блогында болған оқиғаға байланысты қылмыстық іс қозғалды.
ҚазТАГ агенттігінің хабарлауынша, Алматы полициясы аталған оқиғаға байланысты қылмыстық іс қозғаған. «Қылмыстық істі Бостандық аудандық полиция басқармасының полиция бөлімі тергеп жатыр. Тергеу барысында барлық мән-жай, соның ішінде санитариялық-эпидемиологиялық қызмет жүргізген тексерудің нәтижелері зерделенеді. Жиналған деректер негізінде тиісті процестік шешім қабылданады», – деп Алматы полициясы мәлімдеді.
Осы орайда екі жыл бұрын Маңғыстау облысының Бесшоқы ауылындағы мектеп оқушыларының жаппай улану оқиғасы еске түседі. Ол кезде балалар мен мектеп асханасын тексеру барысында ішек бактериялары анықталып, асхананың 12 қызметкерінен стафилококк инфекциясы табылған еді. Санитариялық талаптарды бұзғаны үшін асхана меңгерушісі Дәметкен Шәкенова бір жылға бас бостандығынан айырылды .
Сол оқиғадан кейін Премьер-министрдің тапсырмасымен Маңғыстау облысындағы барлық мектеп асханалары тексерілгені есімізде 2025 жылғы маусымда аяқталған тексеру нәтижесінде 66 мектеп асханасының 65-інен заңбұзушылық анықталды.
Бесшоқыдағы оқушылардың жаппай улануына кінәлі адам сотталғаннан кейін небәрі бір жылдай уақыт салыстырмалы түрде тыныш өтті. Соған қарағанда, бұл оқиға көп ұзамай ұмытылған тәрізді. Енді осындай жағдай Алматыдағы беделді мектептердің бірінде қайталанып отыр.
Мұның өзі балаларды тамақтандыру қызметін көрсететін ұйымдарға жүргізілетін бақылаудың қаншалықты тиімді екеніне күмән туғызады. Әдеттегідей, осы оқиғадан кейін санитариялық-эпидемиологиялық қызмет Алматыдағы барлық мектеп асханаларын жаппай тексеруге кіріседі деп болжаймыз.
