Ташкент. 19 қазан. ИНТЕРФАКС – Өзбекстан мен АҚШ кеңейтілген стратегиялық әріптестік жөніндегі диалог аясында алғашқы келіссөздерін өткізді. Тараптар сауда-экономикалық ынтымақтастықты дамыту, инвестиция тарту және қауіпсіздік саласындағы өзара іс-қимыл мәселелерін талқылады. Бұл туралы Өзбекстанның сыртқы істер министрі Бахтиёр Саидов хабарлады.
«Бүгін Самарқандта америкалық әріптесім, АҚШ мемлекеттік хатшысы Марко Рубиомен бірге Өзбекстан мен АҚШ арасындағы кеңейтілген стратегиялық әріптестік жөніндегі диалогтың алғашқы отырысын өткіздік», – деп жазды Саидов Telegram арнасында.
Министрдің айтуынша, жаңа диалог алаңының іске қосылуы Өзбекстан мен АҚШ арасындағы қарым-қатынасты жүйелі түрде дамыту жолындағы маңызды қадам саналады.
Келіссөз барысында тараптар екі ел басшылары қол жеткізген уағдаластықтарды толық әрі уақтылы орындау, сауда мен инвестиция көлемін ұлғайту, сондай-ақ энергетика, стратегиялық маңызы бар минералдар және озық технологиялар салаларындағы ынтымақтастықты дамыту мәселелері жөнінде жан-жақты пікір алмасты.
Білім беру, мәдени-гуманитарлық байланыстар мен қауіпсіздік саласындағы ынтымақтастыққа ерекше назар аударылды.
«Бұл диалог өзара сенімді нығайтуға, бірлескен жобаларды ілгерілетуге, сондай-ақ стратегиялық әріптестігіміз аясында жаңа бастамалар мен жобаларды жүзеге асыруға берік негіз қалайды деп сенеміз», – деді Өзбекстан сыртқы істер министрі.
АҚШ мемлекеттік хатшысы Марко Рубио Самарқандқа бір күн бұрын келген.
19 қазанда осы қалада Орталық Азия елдері мен АҚШ сыртқы істер министрлерінің C5+1 форматындағы кездесуі өтеді. Тараптар өңірлік экономикалық байланыстарды нығайту, энергетикалық қауіпсіздікті күшейту және ынтымақтастықтың басым бағыттары бойынша бірлескен шешімдер әзірлеу мәселелерін талқылайды.
Сондай-ақ осы күні Өзбекстан президенті Шавкат Мирзиёевтің қатысуымен АҚШ пен Өзбекстанның іскерлік және инвестициялық кеңесінің екінші отырысын өткізу жоспарланған.
