Kazinform агенттігінің хабарлауынша, Қазақстан Премьер-министрі Олжас Бектенов Шанхай ынтымақтастық ұйымына (ШЫҰ) мүше елдерді сауда байланыстарын нығайтуға, көлік дәліздерін дамытуға және цифрлық жобаларды бірлесіп жүзеге асыруға шақырды. Бұл бастамалар Душанбеде өткен ШЫҰ Үкімет басшылары кеңесінің отырысында ұсынылды. «(…) Көлік саласында Қазақстан «Бір белдеу, бір жол» бастамасын өңірдегі қолданыстағы және болашақ көлік дәліздерімен ұштастыру мәселесін тұрақты түрде талқылауды ұсынды. Сонымен қатар 2035 жылға дейінгі көлік байланыстарын дамыту стратегиясында бірыңғай көлік жүйесін қалыптастырудың негізгі бағыттарын айқындау қажеттігі айтылды. Қазақстан теңіз және құрлық порттарын жаңғырту, олардың өткізу мүмкіндігін арттыру бағытындағы бірлескен жұмысты жандандыруды да қолдайды. Мұндай ынтымақтастықты дамытуға Транскаспий халықаралық көлік бағыты негіз бола алады. Алдағы уақытта осы бағыт арқылы тасымалданатын жүк көлемін жылына 10 млн тоннаға жеткізу жоспарланып отыр».
Еуразия24 пікірі:
Қазақстан ұсынып отырған бастамалардың барлығы нақты экономикалық мақсаттарды көздейді. Еліміз үшін басты міндет – тиімді географиялық орналасуын пайдаланып, жүк транзитінен алынатын төлемдермен ғана шектелмей, қосымша табыс көздерін қалыптастыру. Ол үшін порттар мен теміржолдардың үздіксіз жұмыс істеуі, тарифтердің тұрақты әрі алдын ала болжамды болуы, кедендік рәсімдердің өзара үйлестірілуі және жүктердің шекарада кідіріссіз өтуі қамтамасыз етілуі тиіс.
Ал ШЫҰ елдері үшін Ресей аумағын айналып өтетін балама бағыт саналатын Транскаспий халықаралық көлік маршрутының (Орта дәліз) маңызы ерекше.
«Жүк тасымалдау уақытын бір ғана шешім арқылы қысқарту мүмкін емес. Ол үшін бағыт бойындағы барлық негізгі инфрақұрылымды, атап айтқанда, порттар мен терминалдарды, теміржол желілерін және цифрлық жүйелерді кезең-кезеңімен жаңғырту қажет», – деді «Транскаспий халықаралық көлік маршруты» халықаралық қауымдастығының бас хатшысы Нұргүл Жақыпова The Times of Central Asia басылымына берген сұхбатында . ШЫҰ аясында халықаралық мультимодальды тасымалдарға арналған бірыңғай цифрлық платформа құру бастамасы да нақты шешіммен бекітілді. Душанбеде өткен отырыстың қорытындысы бойынша аталған платформаның тұжырымдамасын қабылдау туралы шешімге қол қойылды.
