Париж. 22 қазан. ИНТЕРФАКС – Францияның бюджет туралы заң жобасында елдің қазіргі президенті Эмманюэль Макронның қызметтен кеткеннен кейін пайдаланатын кеңселеріне 2,3 млн еуро бөлу қарастырылған. Бұл туралы бейсенбі күні Politico басылымы хабарлады.
Басылымның жазуынша, Франция Конституциясы бір адамның қатарынан үш мерзім президент болуына тыйым салады. Алайда мемлекет басшысы қызметінен кеткеннен кейін де бірқатар жеңілдіктерді пайдалану құқығын сақтап қалады.
Шамамен жеті айдан кейін Макронның президенттік өкілеттігі аяқталып, ол Елисей сарайынан кетеді. Осыған байланысты шығындар қазірдің өзінде бюджет жобасына енгізілген. Politico редакциясының қолына түскен парламенттік есепке сәйкес, Франция парламентінде талқыланып жатқан келесі жылдың бюджет жобасында осы мақсатқа 2,3 млн еуро қарастырылған.
«Бұл қаражат Макронның болашақ кеңселерін жабдықтауға арналған. Сондай-ақ оған алдағы алты жылдағы ғимаратты жалға алу, күтіп ұстау және қауіпсіздігін қамтамасыз ету шығындары кіреді. Францияның бұрынғы президенттеріне өмір бойы бірқатар жеңілдік беріледі. Атап айтқанда, олар зейнетақы алып, қызметтік кеңсемен, жеке жүргізушімен және полиция күзетімен қамтамасыз етіледі. Қызметтен кеткеннен кейінгі алғашқы бес жылда бұрынғы президенттер жеті адамға дейін қызметкер ұстауға құқылы. Одан кейін қызметкерлер саны үш адамға дейін қысқарады», – делінген жарияланымда.
Басылымның мәліметінше, тиісті қаражат қарастырылғанымен, Макрон болашақ кеңсесінің қай жерде орналасатынын әлі нақты шешпегенге ұқсайды.
Қазір Францияның бұрынғы президенттері Николя Саркози мен Франсуа Олланд осындай жеңілдіктерді пайдаланып отыр. Айта кетейік, Олланд президенттік қызметтен кеткеннен кейін парламентке депутат болып қайта оралған.
Жақында Олланд бұрынғы кәсіби қызметіне байланысты төлемдер мен қазіргі табысынан бөлек, ай сайын 5 мың еуро көлемінде президенттік зейнетақы алатынын мәлімдеді.
Францияның қазіргі тарихындағы ең жас президент атанған Макрон қызметінен кеткен кезде 49 жаста болады. Ол бұған дейін президенттік зейнетақыдан бас тартатынын айтқан.
Макрон президенттік өкілеттігі аяқталғаннан кейін немен айналысатынын әзірге жариялаған жоқ. Сондықтан оның алдағы уақытта саяси өмірге қаншалықты белсенді араласатыны белгісіз, деп жазады Politico.
Басылым Франция Конституциясы Макронға қатарынан үшінші мерзімге сайлауға түсуге мүмкіндік бермейтінін еске салды. Алайда келесі президент қызметіне кіріскеннен кейін ол мемлекет басшысы лауазымына қайта үміткер бола алады. Мақалада Макронның өзі де мұндай мүмкіндікті жоққа шығармайтыны айтылған.
Францияның қазіргі президенті екінші мерзімін 2027 жылғы мамырда аяқтайды. Макрон бұған дейін үзілістен соң, мәселен, 2032 жылғы президент сайлауына қатысуы мүмкін екенін көпшілік алдында айтқан. Дегенмен бұл мәселе төңірегінде саяси және құқықтық пікірталастар әлі жалғасып келеді.
Франция Конституциясының 6-бабына сәйкес, бір адам қатарынан екі мерзімнен артық президент бола алмайды. Ал адамның өмір бойы қанша рет президент болып сайлана алатынына қатысты жалпы шектеу елдің негізгі заңында көрсетілмеген.
