Евразия24ЖаңалықтарҚұрылтай 16 жасқа толмаған балалардың әлеуметтік желілерде тіркелуіне тыйым салу туралы заң...

Құрылтай 16 жасқа толмаған балалардың әлеуметтік желілерде тіркелуіне тыйым салу туралы заң жобасын бірінші оқылымда мақұлдады

|

|

Астана. 18 қараша. ИНТЕРФАКС-ҚАЗАҚСТАН – Құрылтай сәрсенбі күнгі отырысында «Қазақстан Республикасының кейбір заңнамалық актілеріне онлайн-платформалар және масс-медиа мәселелері бойынша өзгерістер мен толықтырулар енгізу туралы» заң жобасын бірінші оқылымда мақұлдады.

«16 жасқа толмаған пайдаланушылардың онлайн-платформаларда тіркелуіне тыйым салу ұсынылады. Онлайн-платформалардың меншік иелері мен өкілдіктері пайдаланушылардың жасын тексеруге міндеттеледі. Алайда бұл шектеу адамдардың өзара қарым-қатынас жасауына, ата-аналарымен және мұғалімдерімен байланысуына арналған мессенджерлерге қолданылмайды», – деді Қазақстанның Мәдениет және ақпарат министрі Арман Қырықбаев заң жобасын депутаттарға таныстыру барысында.

Оның айтуынша, онлайн-платформалардың Қазақстан аумағында заңды түрде тіркелген өкілдіктерін ашуын міндеттейтін талапты да заңмен бекіту ұсынылып отыр.

«Сонымен қатар онлайн-платформа иелері мен өкілдіктері уәкілетті органның заңсыз контентті немесе балаға қатысты кибербуллинг деп танылған ақпаратты өшіру туралы нұсқамаларын орындамағаны үшін әкімшілік жауапкершілікке тартылады», – деді министр.

Ол жауапкершілік тек платформалардың өзіне ғана емес, оқырман аудиториясы көп пайдаланушыларға да жүктелуі тиіс екенін атап өтті.

«Осыған байланысты бес мыңнан астам жазылушысы бар анонимді пайдаланушылар мен жария қауымдастықтарды сәйкестендіру тетігін енгізу де қарастырылған», – деп хабарлады Қырықбаев.

Бұдан бөлек, бұқаралық ақпарат құралдарына мемлекеттік органдардың ресми жауаптарын арнайы белгілеу міндетін енгізу көзделген. «Бұл оқырмандарға ресми ақпараттың қайдан алынғанын нақты ажыратуға мүмкіндік береді», – деп түсіндірді ведомство басшысы.

Министрдің айтуынша, заң жобасында адамның ар-намысы мен беделіне нұқсан келтіретін мәліметтер жарияланған жағдайда, оларды теріске шығаратын ақпаратты сол мәлімет таралған дереккөзде, оның ішінде әлеуметтік желілерде жариялау талабы да қарастырылған.

Сонымен қатар адамның бейнесін оның келісімінсіз пайдалану жағдайлары нақтыланады. Ашық дереккөздерде жарияланған адамның суретін оның келісімінсіз пайдалануға тек сол адам суретті одан әрі қолдануға тыйым салмаған жағдайда ғана рұқсат етіледі. Сондай-ақ адамның жеке және отбасылық өміріне қатысты мәліметтер мен бейнелер оның қызметтік немесе қоғамдық қызметіне жатпайтыны заңмен нақты бекітіледі.

Бұдан бөлек, интернет-басылымдарды және бұқаралық ақпарат құралдарын есепке қою немесе қайта есепке қою кезінде олардың домендік атаулары мен атауларында қорлау сипатындағы сөздерді пайдалануға жол бермеу талаптары енгізіледі.

Құрылтай депутаттары «Қазақстан Республикасының Әкімшілік құқық бұзушылық туралы кодексіне онлайн-платформалар және масс-медиа мәселелері бойынша өзгерістер мен толықтырулар енгізу туралы» заң жобасын да бірінші оқылымда мақұлдады.

Құжатта онлайн-платформаларда заңсыз контент таратқаны үшін әкімшілік жауапкершілікті заң жүзінде бекіту, олардың Қазақстан аумағындағы өкілдіктерін уәкілетті органның заңсыз контентті өшіру туралы нұсқамаларын орындамағаны үшін жауапкершілікке тарту, сондай-ақ бұқаралық ақпарат құралдары мен онлайн-платформаларда бейәдеп сөздер қолданғаны үшін әкімшілік жаза енгізу қарастырылған.

Перепечатка и копирование материалов допускаются только с указанием ссылки на eurasia24.media

Бөлісу:

Читать далее:
Related

«Самұрық-Қазына» қорының жаңа басшысы жақын арада тағайындалады – Қазақстан Премьер-министрі

Қазақстан Премьер-министрі, «Самұрық-Қазына» мемлекеттік қоры директорлар кеңесінің төрағасы Олжас Бектенов қордың жаңа басшысы жақын арада тағайындалатынын хабарлады.

Еуропалық комиссия ЕО-ның санкциялар жөніндегі басқармасын құрып, олардың орындалуына жауапты жаңа арнайы өкілді тағайындады

Еуропалық комиссия (ЕК) сәрсенбі күні Еуропалық Одақтың санкциялар жөніндегі басқармасы (EU Sanctions Office) құрылғанын және швед дипломаты Ларс Даниэльссонның ЕО санкцияларын іске асыру жөніндегі халықаралық арнайы өкіл болып тағайындалғанын хабарлады.

Сомали президенті БАӘ-ні ел аумағында рұқсатсыз әскери базалар салып, билікке қарсы күштерді қолдады деп айыптады

Сомали президенті Хасан Шейх Махмуд Біріккен Араб Әмірліктерін (БАӘ) елдің ішкі істеріне араласып, орталық биліктің рұқсатынсыз әскери нысандар орналастырды деп айыптады.

Ресеймен жан-жақты стратегиялық әріптестік

Қазақстан Президенті Қасым-Жомарт Тоқаев Ресей Жоғарғы сотының төрағасы Игорь Красновты қабылдады, деп хабарлады сәрсенбі күні Мемлекет басшысының баспасөз қызметі.