Астана. 2 қыркүйек. ИНТЕРФАКС-ҚАЗАҚСТАН – Қытай Қазақстанның сенімді көршісі әрі стратегиялық серіктесі болып табылады, деп мәлімдеді Қазақстан Президенті Қасым-Жомарт Тоқаев.
Мемлекет басшысының баспасөз қызметі хабарлағандай, Бейжіңде өткен Қазақстан-Қытай Іскерлік кеңесінің отырысында сөйлеген сөзінде Тоқаев Қытайды “тағдыр жазған сенімді көрші, жақын дос және мәңгілік стратегиялық серіктес” деп сипаттады.
Президенттің айтуынша, ортақ тарих, тату көршілік және өзара түсіністік сияқты берік құндылықтарға сүйене отырып, Қазақстан мен Қытай жыл сайын жаңа сапалы мазмұнмен толығып отыратын берік әрі серпінді іскерлік байланыстар орната білді.
«Әлемдік ауқымдағы көшбасшы ретінде Қытай Қазақстанның түрлі саладағы, соның ішінде сауда саласындағы басты әріптесі саналады», – деді Тоқаев. Оның сөзінше, өткен жылдың қорытындысы бойынша екі ел арасындағы өзара сауда айналымы 44 миллиард АҚШ долларына жеткен.
«Бұл – рекордтық көрсеткіш. Дегенмен, біз мұнымен шектелмейміз. Алдағы бес жылда бұл көрсеткішті Қытайдағы серіктестерімізбен бірлесіп айтарлықтай арттыруды көздеп отырмыз. Бізде бұл мақсатқа жетуге қажетті әлеует бар. Мемлекет басшылары деңгейінде ынтымақтастықты нығайтуға бағытталған саяси ерік-жігер мен өзара ниет бар», – деді Қазақстан Президенті.
