Астана. 12 қыркүйек. ИНТЕРФАКС-ҚАЗАҚСТАН – Қазақстан Премьер-министрі Олжас Бектенов LuLu Group International компаниясының негізін қалаушы Юсуф Али Мусалям Виттиль Абдул Кадермен кездесіп, республикадағы агроөнеркәсіп кешені саласындағы инвестициялық жобаларды іске асыру перспективаларын талқылады. Бұл жөнінде Үкімет басшысының баспасөз қызметі хабарлады.
Кездесу барысында LuLu Group басшысы компанияның қазіргі уақытта Қазақстаннан ет және ауыл шаруашылығы өнімдерін импорттап отырғанын атап өтіп, ынтымақтастықты кеңейтуге ниетті екенін білдірді. Ол Қазақстанның жоғары әлеуетін және қолайлы инвестициялық ахуалын ерекше атап өтті.
Тараптар келіссөз аясында компанияның Қазақстан аумағында ет өңдеу зауыты мен ауыл шаруашылығы өнімдерін сатып алуға арналған тарату орталығын салу жоспарына ерекше назар аударды.
«Агроөнеркәсіп кешені – еліміз экономикасының дәстүрлі түрде маңызды салаларының бірі. Қазақстан кооперацияны кеңейтуге дайын. Атап айтқанда, бірлескен агротехнопарктер құру, экспортқа бағытталған логистикалық хабтарды дамыту, электрондық коммерция және өзге де жобаларды іске асыру бағытында. Бұл үшін елімізде барлық қажетті жағдай жасалған», – деді Бектенов, делінген баспасөз қызметінің хабарламасында.
Үкіметтің мәліметінше, бүгінде қазақстандық ауыл шаруашылығы өнімдері әлемнің 70-тен астам еліне экспортталады. Мемлекет бұл көрсеткішті саланы үш есе өнімді ету арқылы екі есе арттыруды көздеп отыр.
Кездесу қорытындысы бойынша мемлекеттік органдарға аталған жобаларды іске асыруға қажетті қолдау көрсету тапсырылды.
LuLu Group International – штаб-пәтері Абу-Дабиде (БАӘ) орналасқан, Азия мен Таяу Шығыстағы ірі бөлшек сауда және дистрибуциялық компаниялардың бірі. Бүгінде топ дүниежүзінің 20-дан астам елінде 260-тан астам әртүрлі форматтағы сауда нысандарын (гипермаркеттер, супермаркеттер, дүкендер, сауда-ойын-сауық орталықтары) басқарады. Олардың қатарында Парсы шығанағы елдері, Үндістан, Мысыр, Индонезия, Малайзия және басқа да мемлекеттер бар.
