Астана. 15 қыркүйек. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Ливерпульде өткен бокстан әлем чемпионатында алтын медаль жеңіп алған отандас спортшыларды құттықтады.
«Ливерпульде өткен бокстан әлем чемпионатында Қазақстан ұлттық құрамасының жеңісті жолын Алуа Балқыбекова, Аида Әбікеева, Торехан Сабырхан, Наталья Богданова және Айбек Оралбай сияқты керемет спортшылар жалғастырды», – деп жазды Мемлекет басшысы Instagram парақшасында.
Президент бұл додада отандас былғары қолғап шеберлерінің өнерін жалпы алғанда сәтті деп бағалады. Сонымен қатар, ол АҚШ-та өтетін Олимпиада ойындарына тыңғылықты дайындықты жалғастыру қажеттігін атап өтті және спортшыларға алдағы уақытта да табыс тіледі.
Ливерпульдегі әлем чемпионатының қорытындысы бойынша Қазақстан құрамасы жалпы командалық есепте бірінші орынды иеленді. Құрама спортшылары жеті алтын, бір күміс және екі қола медаль жеңіп алды.
