Астана. 15 қыркүйек. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев азаматтардың цифрлық кеңістіктегі қауіпсіздігін қамтамасыз ету және киберқауіпсіздік мәселелерін талқылаған Қауіпсіздік кеңесінің отырысын өткізді, деп хабарлайды Мемлекет басшысының баспасөз қызметі.
Жиын барысында заманауи киберқауіптер және оларға қарсы іс-қимыл тәсілдері, аса маңызды ақпараттық инфрақұрылымды қорғау, киберқауіпсіздік индустриясын дамыту және кадр даярлау жүйесін жетілдіру мәселелері қарастырылды.
Мемлекет басшысы киберқылмыстармен, соның ішінде интернет-алаяқтықпен күрестің ерекше маңызын атап өтті. Ол сондай-ақ киберқылмыстарды тергеуге тартылған мемлекеттік органдардың құзыреттерін күшейту қажеттігін айтты.
Президент азаматтардың дербес деректерін қорғауды басты міндет ретінде белгілеп, олардың таралуына жол бергені үшін жауапкершілікті күшейту керектігін атап өтті.
Отырыс қорытындысы бойынша Қасым-Жомарт Тоқаев киберқауіпсіздік саласындағы жүйелі мәселелерді шешуге және стратегиялық тәуекелдерді азайтуға бағытталған нақты шаралар қабылдауды тапсырды.
