Вашингтон. 16 қыркүйек. ИНТЕРФАКС – АҚШ Президенті Дональд Трамп Израильдің Катарға жасаған әуе соққысы жөнінде тек болған соң ғана хабардар болғанын айтты.
Ақ үйде журналистердің 9 қыркүйекте Израильдің Катарға соққы жасағанын қашан және қалай білгені туралы сұрағына жауап берген Трамп: «Сіздермен бір уақытта білдім», – деп жауап берді.
Алайда бұған дейін Axios порталы аты-жөндерін атамаған дереккөздерге сілтеме жасап, Израиль Премьер-министрі Биньямин Нетаньяхудың 9 қыркүйек күні таңертең АҚШ Президентін жоспарланған шабуыл туралы алдын ала хабардар еткенін жазған.
Порталдың мәліметінше, бұл ақпаратты тікелей білетін үш израильдік шенеунік растаған. Олардың айтуынша, Израиль ХАМАС қозғалысының Дохадағы басшылығына қарсы шабуылды дәл сол күні жүзеге асырған.
Израиль билігінің жеті өкілі Израильдің операциясы туралы Ақ үйдің алдын ала хабардар болғанын растаса да, оны тоқтатуға немесе кейінге қалдыруға уақыт тым тығыз болғанын айтқан. Нетаньяху мен Трамп арасындағы қоңырау шалынып, алғашқы жарылыстар басталғанға дейін шамамен 50 минут өткен.
Axios-тың хабарлауынша, АҚШ жағы операция жайлы тек оның басталуынан кейін ғана білдім деген мәлімдемені ұстанған. Израиль тарапы болса, шабуылды сырттан көмексіз, өз бетімен ұйымдастырып, толық жауапкершілікті өзіне алатынын мәлімдеген.
Порталдың тағы бір дереккөзі Израильдің АҚШ-тың алдын ала хабарланбағаны туралы нұсқасын қолдауға келісім бергенін, бұл екіжақты қатынастарды сақтау үшін қажет болғанын түсіндірген. Басқа бір шенеунік Вашингтон шабуыл жайлы толық білген, бірақ қазір тек «сахналық қойылым жасап отыр» деген пікір білдірген. Тағы бір дереккөз мұндай саяси сипаттағы ақпаратты бұрмалау АҚШ үшін қалыпты тәжірибе екенін айтқан.
Ақ үй де, Израиль Премьер-министрінің кеңсесі де бұл мәліметтерге түсініктеме берген жоқ.
9 қыркүйек күні Израиль ХАМАС басшылары орналасқан деп болжанған ғимаратқа әуе соққы жасаған. ХАМАС өкілдерінің хабарлауынша, қозғалыстың жоғары лауазымды мүшелері аман қалғанымен, алты адам қаза тапқан. Олардың қатарында қозғалыстың негізгі келіссөз жүргізушісі Халиль әл-Хайяның ұлы да бар.
Израильлік ресми өкілдер кейінірек Axios порталына берген түсініктемесінде ХАМАС жетекшілері шабуыл басталардан бұрын кездескен орнынан кетіп қалғанын растаған.
