МӘСКЕУ. 17 қыркүйек. ИНТЕРФАКС-ҚАЗАҚСТАН — TikTok әлеуметтік желісінің АҚШ-тағы бөлімшесі Oracle Corp. (SPB: ORCL) қатысатын инвесторлар консорциумына сатылуы мүмкін. Бұл туралы The Wall Street Journal басылымы жағдайдан хабардар дереккөздерге сілтеме жасап хабарлады.
Басылым мәліметінше, TikTok-тың америкалық бөлімшесі дербес компания ретінде қайта құрылып, оның бақылау пакеті Oracle, Silver Lake, Andreessen Horowitz сынды инвесторлардан және TikTok-тың қазіргі иесі — ByteDance компаниясындағы үлесі бар Susquehanna International, KKR және General Atlantic сынды серіктестерден құралған консорциумға өтеді. Жаңа құрылымның 80%-дан астамы осы топқа тиесілі болады, ал қытайлық акционерлерге 20%-ға жетпейтін үлес қалады.
Жаңа компания шеңберінде TikTok-тың америкалық пайдаланушылары жаңартылған қосымша нұсқасына ауысуға шақырылады. Қазір бұл нұсқа тестілеуден өтіп жатыр. TikTok инженерлері қолданушыларға ұсынылатын контентті анықтайтын алгоритмдерді қайта жазуда, ал америкалық азаматтардың жеке деректері Техаста орналасқан Oracle-дың деректер орталықтарында сақталады.
Келісімді мақұлдау процесі аяқталуға жақын. Бұған дейін АҚШ президенті Дональд Трамп TikTok компаниясына америкалық активтерін сату немесе ел аумағындағы жұмысын тоқтату үшін берілген мерзімді 16 желтоқсанға дейін ұзартқан еді. Алдыңғы мерзім 17 қыркүйекте аяқталуға тиіс болатын.
TikTok-тың болашағына қатысты келіссөздерге бір жылдан астам уақыт болды. Сейсенбі күні Дональд Трамп TikTok бойынша мәміле Қытай тарапымен келісілгенін растады.
«TikTok мәселесіне қатысты келісім бар», — деді ол Ақ үйде журналистерге. — «Оны сатып алуға ниетті аса ірі компаниялар бар».
