ДУБАЙ. 17 қыркүйек. ИНТЕРФАКС-ҚАЗАҚСТАН — Иран Сыртқы істер министрлігінің өкілі Исмаил Бағаи ислам елдерін Израильмен барлық қарым-қатынасты тоқтатуға және Тель-Авивтің “соғысқа итермелеу саясатын” айыптауға шақырды. Бұл жөнінде Tasnim агенттігі хабарлады.
«Ислам елдері осы бастамаларға қосылып, Израильдің қылмысы мен агрессияшыл саясатына нақты түрде қарсы ұстаным танытуы керек», — деп мәлімдеді ол.
Иран СІМ өкілінің айтуынша, Тегеран барлық елдерді, әсіресе аймақтағы мемлекеттерді Израильмен байланысты үзуге үндейді. Ол Тель-Авивпен қарым-қатынасты қалыпқа келтіру әрекеттері Израиль жасаған зорлық-зомбылық пен басқыншылықты заңдастырумен тең екенін айтты.
Айта кетейік, 9 қыркүйекте Израиль Доха қаласында орналасқан ХАМАС қозғалысы жетекшілерінің кеңсесіне соққы берген. Палестиналық топтың мәлімдеуінше, ұйым басшылығының негізгі мүшелері аман қалғанымен, шабуыл салдарынан алты адам қаза тапқан, олардың қатарында ХАМАС-тың негізгі мәмілегері Халиль әл-Хайяның ұлы да болған.
Дохадағы бұл соққыны көптеген мемлекет, соның ішінде бірқатар мұсылман елдері айыптады.
