Ақорда хабарлайды: «Мемлекет басшысы Әлемдік және дәстүрлі діндер лидерлерінің VIII съезіне қатысу үшін Астанаға келген Мәскеу және бүкіл Русь Патриархы Кириллмен кездесу өткізді. Президент бұл кездесудің Қазақстан мен Ресей арасындағы ынтымақтастықты тереңдетуге бағытталған тағы бір маңызды қадам екенін атап өтті. «Ең алдымен, Съезд күндері бізбен бірге болу жөнінде қабылдаған шешіміңіз үшін сізге шынайы ризашылығымды білдіремін. Бұл Форумның табысты өтуі жолында сіздің қатысуыңыз ерекше маңызға ие. Біз өз тарапымыздан сізге зор құрметпен қараймыз. Қазақстан мен Ресей – стратегиялық серіктес әрі сенімді одақтас екенін өзіңіз де жақсы білесіз», — деді Президент, Патриарх Кирилл Мемлекет басшысы Қасым-Жомарт Тоқаевқа көрсетілген құрмет пен жылы қабылдау үшін алғыс айтып, Ресей православие шіркеуінің басты миссиясы бейбітшілік пен халықтар арасындағы өзара түсіністікті нығайтуға бағытталғанын атап өтті. «Қазақстанға жасаған әр сапарым мен үшін ерекше әсерге толы. Бұл жолы да сондай көңіл күйдемін. Қазақстан – біз үшін бауырлас мемлекет. Біз ғасырлар бойы бірге өмір сүрдік. Қазір мемлекеттеріміз әртүрлі болғанымен, достық, өзара қолдау және ынтымақтастық байланыстарын сақтап келеміз, – деді Мәскеу Патриархатының басшысы.
Евразия24 пікірі:
Біз Мемлекет басшысы Қасым-Жомарт Тоқаев пен Патриарх Кириллдің Астанада өтіп жатқан Әлемдік және дәстүрлі діндер лидерлерінің VIII съезі аясындағы кездесуіне қатысты ақпарат Ақорданың ресми Telegram арнасында 17 қыркүйекте жарияланған алғашқы хабарлама болғанына назар аудардық. Осыдан кейін ғана іс-шара барысынан мәтіндік трансляция басталды. Саяси тұрғыдан алғанда, бұл — Астана үшін Мәскеумен жүргізілетін диалогтың маңыздылығын білдіретін нақты белгі. Біз Қасым-Жомарт Кемелұлының Патриархпен кездесуі кезінде айтқан бір сөз тіркесіне де назар аудардық: «Бұл Форумның табысты өтуі жолында сіздің қатысуыңыз ерекше маңызға ие» деген пікірінде Президент белгілі бір астарды меңзегендей әсер қалдырады. Атап айтқанда, «ерекше мәнге ие» және «табысты өту» деген тұжырымдар Мемлекет басшысының Ресей Православие шіркеуінің ықпалын ескере отырып, бұл институттың Мәскеуге бейбіт үн жеткізе алатын әлеуетін байыппен қабылдайтынын аңғартуы мүмкін. рине, бұл біздің жорамалымыз ғана.
Алайда Қасым-Жомарт Тоқаевтың дипломатиялық риторикасы бұрыннан белгілі: ол бір ғана сөзбен терең саяси мағына беруге қабілетті екенін талай рет дәлелдеген.
