Дубай, 20 қыркүйек. ИНТЕРФАКС. Түркия президенті Режеп Тайып Эрдоган алдағы аптада АҚШ президенті Дональд Трамппен өтетін кездесуі аймақтағы жанжалдарды тоқтатып, бейбітшілікті нығайтуға үлес қосады деп есептейді.
«Президент Трамппен өтетін кездесуіміз — біздің жаһандық бейбітшілікке ортақ көзқарас аясында — аймақтағы соғыс мен қақтығыстарды тоқтатуға және арадағы ынтымақтастықты тереңдетуге ықпал етеді деп сенемін», – деп жазды Эрдоган түрік әлеуметтік желісі NSosyal парақшасында.
Мемлекет басшысы сондай-ақ Ақ үйдегі кездесу барысында «құрметті әріптесім әрі досым, АҚШ президенті Дональд Трамппен, одақтасымыз және бізбен жан-жақты стратегиялық байланысы бар елмен» сауда, инвестициялар және қорғаныс өнеркәсібі салаларындағы бірқатар маңызды мәселелер талқыланатынын атап өтті.
Бұған дейін Трамп 25 қыркүйекте Вашингтонда Эрдоганмен келіссөз жүргізетінін мәлімдеген болатын.
«Біз Түркиямен бірқатар ірі сауда және әскери келісімдер бойынша жұмыс істеп жатырмыз. Оның ішінде Boeing ұшақтарын сатып алу, F-16 жойғыштарына қатысты ірі келісім, сондай-ақ F-35 жойғыш-бомбалаушы ұшақтарына байланысты келіссөздер, олардың табысты аяқталатынына сенеміз», – деді АҚШ президенті.
Айта кетейік, маусым айының соңында АҚШ-тың Түркиядағы елшісі Томас Барак Анкара мен Вашингтон арасында F-35 бағдарламасынан Түркияны шығару мәселесін 2025 жылдың соңына дейін шешуге болады деген болжам жасаған еді. Еске салайық, Түркия бұл бағдарламаға қатысу құқығынан ресейлік С-400 зениттік-зымыран кешендерін сатып алғаннан кейін айырылған болатын.
