Вашингтон, 20 қыркүйек. Интеракс. АҚШ ел ішінде қару-жарақ пен әскери техника қорының азаюына байланысты бірқатар елдерге қару жеткізуге қатысты шектеулер енгізе бастады. Бұл туралы Atlantic журналы сенімді дереккөздерге сілтеме жасап хабарлады.
Басылымның жазуынша, АҚШ әкімшілігі ұлттық қорғаныс мүдделерін одақтастармен қару саудасынан жоғары қоя бастады.
Мақалада келтірілген дерекке сәйкес, АҚШ Қорғаныс министрінің бұрынғы орынбасары Элбридж Колби Мемлекеттік департамент өкілдерімен телефон арқылы сөйлесу барысында шетелге қару сату кейде тиімсіз екенін атап өткен. Ол, әсіресе, Patriot әуе шабуылынан қорғану жүйелерін Данияға беруге қарсы болған. Оның пікірінше, бұл кешендер АҚШ-тың өз қорғанысы үшін стратегиялық маңызға ие, сондықтан алдымен ел ішінде сақталуы тиіс.
Atlantic деректеріне сүйенсек, Пентагондағы зымыран қоры жоспарланған әскери қажеттіліктің тек 25%-ын ғана қамтиды.
Бұған дейін Вашингтон Данияға Patriot жүйесін сату мәселесін бірнеше апта бойы талқылаған, бірақ кейін бұл бастамадан толықтай бас тартқан. Бұл шешім мемлекеттік органдарда тосын реакция тудырғанымен, кейінірек белгілі болғандай, шектеу тек Данияға ғана емес, өзге де еуропалық серіктестерге қатысты қолданылып отыр.
Atlantic басылымының жазуынша, Пентагон қару-жарақтың кейбір түрлері бойынша тапшылық туындағанын мойындап, Еуропадан келіп түскен жаңа сұраныстарды уақытша тоқтату туралы шешім қабылдаған.
Сонымен қатар, журнал бұл шектеулер Украинаға бөлінетін көмекке әсер етпейтінін, себебі ол бөлек бағдарлама аясында жүзеге асырылып жатқанын атап өтеді.
