BES.media вице-министр Ержан Біржановтың сөзіне сілтеме жасап хабарлайды: «Маркетплейстерде тауар сататын жеке кәсіпкерлерге қандай мөлшерлеме бойынша салық төленетінін енді өңірлердің өздері шешеді. Жергілікті мәслихат мұндай кәсіпкерлер үшін табыс салығының мөлшерлемесін 4%-ға дейін төмендетуге немесе көтеруге құқылы. Бұл санатқа біз арнайы жеңілдетілген салық режимін қарастырдық. Жеңілдетілген режим бойынша жылдық айналым шегі – 2,5 млрд теңге. Бұл режимде қосылған құн салығы алынбайды, салық айналымнан есептеледі», – деп түсіндірді қаржы вице-министрі. Оның айтуынша, егер кәсіпкер шартты түрде 1 млрд теңгенің тауарын сатса, қазіргі базалық мөлшерлеме бойынша 4% салық төлейді. «Бірақ жергілікті мәслихаттар бұл мөлшерлемені екі есе төмендетуі де, арттыруы да мүмкін. Бұл шешім өңірдің экономикалық жағдайына байланысты қабылданады. Сондықтан бұл режим икемді әрі тиімді».
Евразия24 пікірі:
Астана ел бойынша салық түсімдерін ұлғайтуды басты мақсат етіп қойды. Осы мәселе 2025 жыл бойы сарапшылар қауымында қызу талқыланып келеді. Дәл осы тұста Қаржы министрлігі электронды сауда алаңдарында жұмыс істейтін жеке кәсіпкерлер үшін жаңа салық тәртібін жариялады. Кодексте бекітілген 4% мөлшерлеме енді төмендетілуі де, көтерiлуi де мүмкін. 2026 жылы салық жинау науқаны басталғанда, өңірлер барынша жоғары көрсеткіш көрсетуге мүдделі болатыны анық. Мұндай жағдайда салықты төмендетуге ешкім бармайды деуге болады. Бұл сайып келгенде маркетплейстердегі тауарлардың қымбаттауына әкеледі. Бағасы мен қолайлылығы бойынша онлайн-сауда артықшылығы әлсіреп, дәстүрлі оффлайн саудасымен теңесуі ықтимал. Бұл – соңғы жылдары тұрақты түрде сатып алушы жоғалтып келе жатқан базарлар мен сауда орталықтарының мүддесіне сай сценарий.
