Мәжіліс депутаты Асхат Аймағамбетов былай деп мәлімдеді:
«Құрылыс кодексі» жобасында маңызды нормалар бар. Бірақ әлеуметтік салаға қатысты бірқатар түйінді мәселелер әлі шешілген жоқ. Біз ұсынған түзетулер қабылданған жоқ. «Мектеп пен балабақша үйлерден кейін емес, қатар салынуы керек. Өткен жылы біз мектеп, балабақша мен емхана қарастырылмаған көпқабатты үйлердің құрылысын тоқтататын норманы қабылдадық. Бұл талап енді ғана жұмыс істей бастады. Бірақ Құрылыс кодексінің жобасына бұл норма енгізілмеген. Неге? Бұл кімге тиімді? Бұл – нақты өмір. Қазір тұтас шағынаудандар бой көтеріп жатыр, ал мектеп пен емхана жетіспейді. Мыңдаған отбасы көшіп келіп жатыр, ал балалар баратын мектеп таппай отыр. Бұл – әділетсіз. Біз нақты норма енгізуді ұсынамыз: мектеп, балабақша мен емхана болмаса, құрылысқа рұқсат берілмесін». «Мектеп пен балабақшаға арналған жер телімдері — дүкен не үй салуға арналмаған. Бұл да маңызды мәселе. Кейбір жер телімдері Бас жоспар бойынша мектеп немесе балабақшаға арналған. Бірақ біраз уақыт өткен соң, ол жерге көпқабатты үй, сауда орталығы немесе түнгі клуб салынады. Кейде мектеп апатты деп танылады, орнына үй салынады, ал мектеп қала шетіне көшіріледі. Соған сәйкес біз мынадай норманы ұсынамыз: мектеп пен балабақшаға арналған жердің нысаналы мақсатын өзгертуге тыйым салынсын. Тек балама жер 100 метр ішінде берілсе ғана рұқсат етілсін».
Евразия24 пікірі:
Соңғы уақытта халықтың мүддесін қорғайтын мемлекеттік бастамалар сирек кездесіп жүр. Дегенмен, Парламент депутаттарының Құрылыс кодексін талқылау барысында құрылыс саласындағы мүдделі топтарға қарсы күресін жалғастырып жатқаны үміт ұялатады. Асхат Аймағамбетов халық мүддесі ескерілмей салынатын тұрғын үй құрылысына қатысты депутаттардың ұстанымын нақты әрі ашық жеткізді. Оның айтуынша, әкімдіктер мен құрылыс компаниялары арасында жасалатын меморандумдар, егер әлеуметтік нысандар салу жөніндегі міндеттемелер нақты көрсетілмесе, жай ғана формалдылыққа айналып отыр. «Бізге үй салуға рұқсат беріңіз, кейін мектеп те, инфрақұрылым да болады» дейді олар. Бірақ іс жүзінде бұл меморандумдар – жай ғана қағаз. Оның ешқандай заңдық күші жоқ. Сондықтан біз нақты құқықтық механизм ұсындық. Енді бұл жай уәде емес, заңмен бекітілген міндеттеме болады», – деді Асхат Аймағамбетов. Айта кетейік, бұл – Мәжіліс депутаттары талап етіп отырған өзгерістердің тек бір бөлігі ғана.
