Астана. 18 қыркүйек. ИНТЕРФАКС-ҚАЗАҚСТАН – Мемлекет басшысы Қасым-Жомарт Тоқаев Халықаралық үстел теннисі федерациясының (ITTF) президенті Петра Сёрлингті қабылдады. Бұл туралы Ақорда мәлімдеді.
Кездесуде Президент 2027 жылы Астанада өтетін үстел теннисінен әлем чемпионатын ұйымдастыруға қолдау көрсеткені үшін Петра Сёрлингке алғыс айтты. Бұл Орталық Азияда үстел теннисінен ұйымдастырылатын алғашқы әлем чемпионаты болмақ.
Тараптар алдағы жарыстың маңызына тоқталды. Әлем чемпионатының Астанада өтуі Қазақстанда ғана емес, Орталық Азияда да үстел теннисінің кеңінен дамуына ықпал етеді деп күтіліп отыр.
Қасым-Жомарт Тоқаев елімізде жастардың үстел теннисіне қызығушылығы артып келе жатқанын атап өтті. Қазір Қазақстанда 260 мыңнан астам адам осы спорт түрімен тұрақты айналысады. Сондай-ақ спортшылар даярлау және жарыстар өткізу үшін қажетті инфрақұрылымды дамытуға мемлекет тарапынан қолдау көрсетіліп келеді.
Петра Сёрлинг өз кезегінде Қазақстанда үстел теннисінің дамуына көрсетіліп отырған қолдау үшін Мемлекет басшысына алғыс айтып, ITTF-тің бұл спорт түрін одан әрі кеңінен насихаттауға бағытталған жоспарларымен бөлісті.
Кездесу соңында Қасым-Жомарт Тоқаев Қазақстандағы үстел теннисінің дамуына қосқан үлесі үшін Петра Сёрлингті II дәрежелі «Достық» орденімен марапаттады.
