Мәжіліс депутаты Болатбек Нажметдинұлы мәлімдеді: «Мен отандастарымыз үшін маңызды жаңалықпен бөліскім келеді. Тыңғылықты келіссөздер мен бірнеше күндік тынымсыз жұмыстың нәтижесінде нақты шешімге қол жеткізілді. Қазақстан Республикасы Үкіметі Ресей Федерациясының уәкілетті органдарымен жедел байланыс орнатып, халықаралық жүк және жолаушы тасымалымен айналысатын жүргізушілерге қатысты жаңа көші-қон шектеулерін қолданбау туралы келісімге қол жеткізді. Бұл шешімнің нәтижесінде: қазақстандық тасымалдаушылар үшін «90 күндік мерзімі» талабы қолданылмайды, жаппай депортация мен айыппұлдар тоқтатылды, шағын автокәсіпорындарда жұмыс істейтін жүргізушілерді қоса алғанда, мыңдаған жұмыс орны сақталып қалды».
Евразия24 пікірі:
Мәжіліс депутаттары мен Үкімет мүшелерінің ЕАЭО шеңберінде Қазақстан азаматтарының мүддесін қорғауға бағытталған шұғыл әрекеті – тағы бір маңызды жетістік. Бұл – ұжымдық жұмыстың нәтижесі ғана емес, мемлекеттің қалай әрекет етуі қажет екенін көрсететін нақты мысал. Яғни, жауапкершілікті басқаға аудармай, өз азаматтары мен бизнесін жедел қорғауға кірісу. «Қазақстан өз азаматтарын қорғайды. Біз мұндай шешімдердің ЕАЭО аясында алдын ала келісіліп, біржақты тәртіпте қабылданбауын талап етеміз. Себебі Одақ – кедергілер қою үшін емес, еркіндік пен өзара құрметке негізделген кеңістік», – деп түйіндейді мәжіліс депутаты Болатбек Нажметдинұлы өзінің әлеуметтік желідегі кең көлемді жазбасында. Бұл сөзбен келісуге толық негіз бар. Тағы бір назар аударарлық жайт – Ресейде көші-қон талаптары өзгергелі бері Мемлекет басшысы Тоқаев пен Ресей президенті Путин бірнеше мәрте жүздесіп, телефон арқылы сөйлесті. Диалог барысында қазақстандықтарға қатысты шектеу мәселесінің көтерілгені әбден мүмкін.
