Астана. 21 қазан. ИНТЕРФАКС-ҚАЗАҚСТАН – Қазақстан мен Әзербайжан президенттері Қасым-Жомарт Тоқаев пен Ильхам Әлиев Каспий теңізі түбі арқылы өтетін суасты талшықты-оптикалық байланыс желісі (ТОБЖ) жобасын жедел жүзеге асыруды екі ел үкіметтеріне тапсырды.
«Келіссөздер барысында Каспий теңізі түбі арқылы талшықты-оптикалық байланыс желісін жүргізу жобасын жеделдетудің маңыздылығы атап өтілді. Үкіметтерге бұл желінің қысқа мерзім ішінде дайын болуын қамтамасыз ету тапсырылды», – деді Тоқаев сейсенбі күні Астанада Әлиевпен өткен келіссөздер қорытындысы бойынша өткен брифингте.
Мемлекет басшысы Қазақстанның мемлекеттік қызметтерді цифрландыру мен IT технологияларын дамытуда тәжірибе жинақтағанын және осы салада Әзербайжанмен бірлескен жобаларды іске асыруға дайын екенін атап өтті.
Бұған дейін Ильхам Әлиев Әзербайжан мен Қазақстан 2027 жылға қарай Каспий теңізі түбімен өтетін суасты талшықты-оптикалық байланыс желісін салуды аяқтайтынын хабарлаған болатын.
Аталған Транскаспийлік ТОБЖ жобасы аясында Каспий теңізі түбімен ұзындығы 380 шақырымды құрайтын суасты талшықты-оптикалық кабель Сумгайыт (Әзербайжан) пен Ақтау (Қазақстан) қалаларының арасында төселеді. Жобаланған өткізу қабілеті – 400 Тбит/с-қа дейін. Бұл кабель арқылы үлкен көлемдегі деректерді жоғары жылдамдықпен тасымалдау мүмкіндігі пайда болады.
