Мәскеу. 21 қазан. ИНТЕРФАКС – Венгрияның MOL компаниясы Сазхаломбатт (Százhalombatta) қаласындағы мұнай өңдеу зауытында (МӨЗ) кеше болған өртке шалынбаған кейбір қондырғылардың жұмысын біртіндеп қайта іске қосуда.
«Өрт сөндірушілер өртті оқшаулап, қазіргі уақытта аумақтың қауіпсіздігін қамтамасыз ету жұмыстарын жүргізуде. Зардап шеккендер жоқ, апаттың нақты себебі анықталу үстінде. Біз төтенше жағдайлар бойынша хаттамаларға сәйкес әрекет етудеміз және залал көлемін бағалау барысында өрттен зардап шекпеген қондырғылардың жұмысын біртіндеп қалпына келтірудеміз», – делінген компанияның мәлімдемесінде.
Компания Венгрияны жанармаймен қамтамасыз ету жалғасып жатқанын, қажет болған жағдайда стратегиялық резервтерді пайдалануды қарастыратынын атап өтті.
Венгрия премьер-министрі Виктор Орбан елдің отынмен қамтамасыз етілуі «қалыпты жағдайда» екенін айтып, Facebook желісіндегі парақшасында: «Сазхаломбаттадағы мұнай өңдеу зауытында болған өрттің мән-жайын қатаң түрде тергейміз», – деп мәлімдеді.
Дунай мұнай өңдеу зауытының AV3 қондырғысында дүйсенбі күні кешке өрт шыққан болатын, сейсенбі күні таңертең ол оқшауланды.
Сазхаломбаттағы МӨЗ – MOL компаниясының негізгі нысандарының бірі, бұл Венгриядағы ең ірі мұнай өңдеу зауыты әрі Орталық және Шығыс Еуропадағы ірі зауыттардың бірі. Қуаттылығы – тәулігіне 165 мың баррель (жылына 8,1 млн тонна). Зауытқа ресейлік мұнай «Дружба» құбыры арқылы жеткізіледі.
