Вашингтон. 1 қараша. ИНТЕРФАКС – АҚШ пен Газа секторында құрылуы ықтимал халықаралық тұрақтандыру контингентіне қатысатын елдер миссияның түрлі аспектілерін талқылауды жалғастыруда, деп хабарлады CNN Таяу Шығыс өңіріндегі дереккөзіне сілтеме жасап.
«CNN-ге жоспарлармен таныс Таяу Шығыстағы бір лауазымды тұлға мәлім еткендей, миссияға қатысуы мүмкін елдер АҚШ-пен бірлесіп, контингенттің жалпы көлемі, әрбір елден жіберілетін әскери қызметшілер саны, басқару иерархиясы, шешім қабылдау үдерісінің басшылығы және әскерлердің орналастыру ұзақтығы сияқты негізгі мәселелерді талқылап жатыр», – делінген ақпаратта.
Сондай-ақ, контингенттің қарулану деңгейі, оның Израиль әскерімен өзара іс-қимылы, сондай-ақ қақтығыс жағдайында әрекет етуге дайындығы сынды тақырыптар бойынша да келіссөздер жүргізілуде.
Дереккөздің айтуынша, бірқатар елдер контингенттің тек уақытша сипатта болуын талап етуде – кейін оның орнын нығайған палестиналық билік алуы тиіс. Кейбір елдер миссияның заңдылығын қамтамасыз ету үшін халықаралық мандат беруді сұраса, өзгелері БҰҰ Қауіпсіздік Кеңесінің тиісті қарары қабылдануын талап етуде.
Бұған дейін Axios агенттігі АҚШ-тың алдағы апталарда Газа секторында халықаралық бітімгерлік күштерін орналастыру жоспарын жариялауы мүмкін екенін хабарлаған болатын.
АҚШ билігі өкілдерінің айтуынша, контингентке Египет, Катар, Біріккен Араб Әмірліктері, Индонезия, Әзірбайжан және Түркия сынды елдер қатысуы ықтимал. Алайда жексенбі күні Израиль премьер-министрі Биньямин Нетаньяху анклавқа қандай елдердің қатысуына рұқсат берілетінін Израиль өзі шешетінін мәлімдеді. Қазан айының соңында Израиль сыртқы істер министрі Гидеон Саар Израильдің Түркия әскерін Газа секторына орналастыруға қарсы екенін айтқан болатын.
9 қазанға қараған түні АҚШ президенті Дональд Трамп Израиль мен палестиналық ХАМАС қозғалысы АҚШ ұсынған Газа секторындағы қақтығысты реттеу жоспарының бірінші кезеңіне келісім бергенін мәлімдеді. Жоспарға уақытша технократиялық үкімет құру, Трамп басқаратын халықаралық бақылау органын енгізу, сондай-ақ тұтқындар мен кепілге алынғандарды айырбастау шаралары кіреді.
Жоспарға сәйкес, ХАМАС Газаны басқаруға ешбір формада – тікелей де, жанама да – қатыспауы тиіс. Барлық әскери, шабуылдаушы және лаңкестік инфрақұрылым, оның ішінде туннельдер мен қару өндіру объектілері жойылып, қайта қалпына келтіруге жатпайды. Қарусыздандыру үдерісі тәуелсіз бақылаушылардың қадағалауымен жүргізіледі.
