Гонконг, 1 қараша. ИНТЕРФАКС.
Оңтүстік Корея президенті Ли Чжэ Мен Қытай Халық Республикасының төрағасы Си Цзиньпинмен кездесуде Сеул мен Пхеньян арасындағы байланыстарды қайта орнатуға Қытай тарапының қолдауына сенім білдірді, деп хабарлайды оңтүстіккореялық “Ренхап” агенттігі.
«Корея Республикасы мен Қытай стратегиялық байланыс арналарының жұмысын күшейтіп, оларды екі Корея арасындағы диалогты қалпына келтіру үшін пайдалануға тиіс. Аймақтық қауіпсіздік мәселесінің маңызын асыра бағалау мүмкін емес», – деді Ли Чжэ Мен.
Мемлекет басшысы Қытай мен Солтүстік Корея арасындағы жоғары деңгейдегі байланыстардың жиілегенін оң үрдіс ретінде атап өтті.
Ал сенбі күні АСЕАН елдері мен ҚХР қорғаныс министрлері арасындағы бейресми кездесулер аясында Оңтүстік Кореяның қорғаныс министрі Ан Гю Бак Қытайдың қорғаныс министрі Дун Цзюньмен кездесіп, Қытайдың Корей түбегінде бейбітшілік пен тұрақтылықты сақтаудағы сындарлы рөлін маңызды деп санайтынын жеткізді.
Сондай-ақ, сенбі күні Оңтүстік Корея мен Қытай арасында жеті екіжақты өзара түсіністік туралы меморандумға қол қойылды. Құжаттар мынадай бағыттарды қамтиды: валюталық алмасу; киберқылмыстармен бірлесіп күресу; сауда және қызмет көрсету саласындағы ынтымақтастықты күшейту; 2026–2030 жылдарға арналған экономикалық ынтымақтастық жоспары; стартаптар бойынша серіктестік бағдарламасын іске асыру.
Осы күні Ли Чжэ Мен АТЭС саммитінің Кёнчжу қаласында өткен жабылу рәсімінде сөз сөйлеп, Сеул алдағы уақытта әскери шиеленісті азайту және Солтүстік Кореямен сенімді нығайту мақсатында алдын алу шараларын жалғастыратынын, бұл түбекте және бүкіл өңірде бейбітшілік орнатуға ықпал ететінін атап өтті.
Еске салсақ, бұған дейін КХДР Сыртқы істер министрінің орынбасары Пак Мен Хо Оңтүстік Кореяның Корей түбегін ядролық қарусыздандыруға қатысты ұмтылысын «орындалмайтын арман» деп атаған болатын.
