Астана. 14 қараша. ИНТЕРФАКС-ҚАЗАҚСТАН – Агроөнеркәсіптік кешенде (АӨК) терең өңделген өнім өндірісін дамыту үшін шетелдік инвесторларды белсенді түрде тарту қажет. Бұл туралы Қазақстан Президенті Қасым-Жомарт Тоқаев Астанада өткен ауыл шаруашылығы қызметкерлерінің форумында мәлімдеді.
«Басты басымдық – ауыл шаруашылығы өнімдерін терең өңдеу. Бүгінде еліміздің агроөнеркәсіптік кешені негізінен шикізат өндіруге бағытталған, бұл шындықты мойындауымыз керек», – деді Мемлекет басшысы.
Президенттің айтуынша, 2023 жылы ауыл шаруашылығы саласындағы өңделген өнім үлесі небәрі 35% болған, ал биыл бұл көрсеткіш 50%-ға жеткен. Келесі жылы бұл көрсеткішті 70%-ға жеткізу міндеті тұр. Осы мақсатта аталған салаға шетелдік инвесторларды тарту жұмыстары жеделдетілуі тиіс.
«Бұл салада іске асыруға болатын жобалар аз емес. Форум басталар алдында олардың бірқатарымен таныстым. Дегенмен, бармен шектелуге болмайды. АӨК-тің негізгі салалары бойынша инвестициялық жобаларды жүзеге асыру қажет. Ең бастысы – жеке инвестицияларды тарту. Әсіресе, озық технологиясы бар шетелдік инвесторлар үшін қолайлы жағдай жасауымыз керек», – деді Тоқаев.
Президенттің сөзінше, қазіргі таңда Үкімет АӨК саласында 200-ден астам инвестициялық жобаның тізімін әзірлеген.
«Бұл жобалардың жалпы құны шамамен 4 трлн теңгені құрайды және олар алдағы үш жыл ішінде 12 салада іске асырылады. Енді осы жобалар барлық деңгейде тиісті қолдауға ие болуы тиіс. Бұл мәселеде орталық пен өңірлер белсенді болуы қажет. Жобалар қашан және қалай жүзеге асырылатыны алдын ала мұқият ойластырылуы тиіс. Акиматтар мен министрліктер жедел әрі үйлесімді жұмыс істеуі керек», – деп түйіндеді Мемлекет басшысы.
