Астана. 14 қараша. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев агроөнеркәсіптік кешенде мал шаруашылығы саласының әлеуетін толық көлемде пайдалану қажеттігін айтты. Бұл бағытты басымдық ретінде айқындау қажет екенін Мемлекет басшысы ауыл шаруашылығы қызметкерлерінің форумында мәлімдеді.
«Бұған дейін біз егін шаруашылығын дамыту бойынша жүйелі жұмыс жүргізіп, жақсы нәтижелерге қол жеткіздік. Енді мал шаруашылығын аграрлық сектордың басым бағыты ретінде мойындау қажет», – деді Президент жұма күні Астанада өткен форумда.
Мемлекет басшысының айтуынша, еліміздің кең байтақ даласында жыл бойы мал жаюға мүмкіндік бар, осы әлеуетті тиімді пайдаланған жөн.
«Мемлекет тарапынан қажетті қолдау көрсетілуде. Қазіргі таңда нақты қаржыландыру тетіктері іске асырылып жатыр: жайылымдарды сумен қамтамасыз ету, бордақылау алаңдарын салу, асыл тұқымды мал алу бағыттарына субсидия қарастырылған. Мәселен, тек былтырдың өзінде осы мақсаттарға 60 млрд теңгеден астам қаржы бөлінді. Сонымен қатар, шаруашылығын кеңейткісі келетін кәсіпкерлерге жеңілдетілген несие де беріледі», – деп еске салды Тоқаев.
Президент Үкіметке мал шаруашылығын дамыту үшін тұрақты және сенімді жағдай қалыптастыруды тапсырды. Сондай-ақ ветеринария саласын қажетті материалдық-техникалық базамен қамтамасыз ету маңызды екенін атап өтті.
