Еуразиялық экономикалық комиссия (ЕЭК) хабарлағандай, ЕЭК-тің бәсекелестік және монополияға қарсы реттеу жөніндегі министрі Максим Ермолович 17 қараша күні Алматыда Қазақстанның бәсекелестік саласындағы заңнамасы мен саясатына арналған Экономикалық ынтымақтастық және даму ұйымының (ОЭСР) екінші шолуының таныстырылымына қатысты. Министр бұл екінші шолудың Қазақстанның ұлттық бәсекелестік саясатын жетілдіру және оны әлемдік үздік тәжірибелермен үйлестіру жолында маңызды рөл атқаратынын атап өтті. Сондай-ақ, ол 2015–2016 жылдары жүргізілген алғашқы шолу аясындағы ұсыныстардың Қазақстан тарапынан табысты жүзеге асырылғанын жеткізді. «Қазақстан бәсекелестік ортаны дамыту, ОЭСР стандарттарын енгізу және жаһандық экономикалық жүйеге бірігу бағытында айтарлықтай жетістіктерге жетті. Екінші шолудың ұсынымдары жаңа табыстарға жол ашып, адал бәсекелестікті қорғауды күшейтуге әрі қазіргі сын-қатерлер жағдайында экономикалық өсімді ынталандыруға сеп болады деп сенемін», – деді ЕЭК министрі Максим Ермолович.
Евразия24 пікірі:
Қазақстан бұл жолы өзін өзі мақтап отырған жоқ – ОЭСР елімізде жүргізіліп жатқан реформалардың есеп үшін емес, шынайы институционалдық жетілуге бағытталғанын ресми түрде мойындады. Бұл – еліміздің ғана емес, Еуразиялық экономикалық одақ үшін де маңызды қадам. Себебі Қазақстан халықаралық стандарттарға сай өзгерістерді одақ аясында да тиімді жүргізуге болатынын көрсетті.Жалпы алғанда, жаһандық экономикалық тұрақсыздық жағдайында ОЭСР-дің екінші шолуы ЕАЭО-ның тек сыртқы ортаға бейімделіп қана қоймай, нарықтық архитектурасына әлемдік үздік тәжірибелерді енгізуге талпынып жатқанын айғақтайды. Қазақстан болса, бұл бағытта еуразиялық кеңістікте алдыңғы қатарда келеді – кәсіби әрі тәуелсіз реттеушісі бар, бизнеске түсінікті ережелері қалыптасқан, адал бәсекелестікті қорғау басты назарға алынған және ашықтыққа дайын ел ретінде танылып отыр.Мұндай сенімділік инвесторларға оң сигнал береді, бизнестегі тәуекелдерді азайтады және ұлттық экономикаға деген сенімді жаңа деңгейге көтереді.
