Geoenergetika INFO порталының хабарлауынша, Венгрия энергетикалық ресурстарды импорттау құқығын қорғауға дайын. Елдің сыртқы істер министрі Петер Сийярто мәлімдегендей, егер Ресейден мұнай мен газ импорттауға тыйым салу шарасы қабылданса, Будапешт бұл шешімге қатысты сотқа жүгінбек. «Егер мұндай шектеу енгізілетін болса, біз бұл шараны сот арқылы шешеміз», – деді министр.
Айта кетейік, Венгрия Ресейден табиғи газ сатып алу мерзімін 2028 жылға дейін ұзартуға қол жеткізді, ал Еуропалық одақ әзірлеген жоспар 2026 жылдан бастап ресейлік газдан кезең-кезеңімен бас тартуды көздейді. Бұған қоса, премьер-министр Виктор Орбан АҚШ-тың бұрынғы президенті Дональд Трамптан қолдау алғаннан кейін, АҚШ Венгрияға Ресейден энергетикалық ресурстар импорттауға қатысты шектеулерді уақытша алып тастады.
Евразия24 пікірі:
2026 жылғы 1 қаңтардан бастап Еуропалық одаққа мүше барлық мемлекеттер үшін Ресейден құбыр арқылы және сұйытылған табиғи газ түрінде жеткізілетін газ бойынша жаңа келісімшарттар жасасуға тыйым салу күшіне енеді. Ал ұзақ мерзімді келісімдер бойынша ресейлік газдан толық бас тарту 2028 жылғы 1 қаңтарға жоспарланған. 2028 жылғы 1 қаңтарға дейінгі өтпелі кезең теңізге тікелей шығатын жолы жоқ және ресейлік газ бойынша 2027 жылдың соңына дейін күшінде болатын ұзақ мерзімді келісімшарттары бар елдер үшін сақталады. Олардың қатарына Венгрия мен Словакия жатады. Дегенмен бұл талаптар Венгрия премьер-министрі Виктор Орбанды қанағаттандырмайды. Себебі, елдің энергетикалық қауіпсіздігі тұрғысынан қарағанда, газды құбыр арқылы жеткізу – ең тиімді әрі үнемді тәсіл. Ал газды танкермен тасымалдау едәуір қымбатқа түседі және ұлттық экономикаға зиян келтіруі мүмкін. Еске сала кетейік, Венгрия бұған дейін Еуроодақтың жаңа газ келісімшарттарына тыйым салу жөніндегі шешімін даулауға тырысқан болатын. Будапешт бұл шектеудің санкция емес, сауда шарасы ретінде қарастырылып, білікті көпшілік даусымен қабылданғанын алға тартты. Осы себепті Венгрия мен Словакияның шешімге қарсы берген дауысы нәтижеге әсер ете алмады.
