Астана. 19 қараша. ИНТЕРФАКС-ҚАЗАҚСТАН – Қазақстан Мәжілісі сәрсенбі күні өткен жалпы отырыста «Қауіпсіз еңбек жағдайларын жетілдіру және жұмыскерлердің еңбек құқықтарын қорғау мәселелері бойынша Қазақстан Республикасының кейбір заңнамалық актілеріне өзгерістер мен толықтырулар енгізу туралы» заң жобасын бірінші оқылымда мақұлдады.
Құжаттың негізгі мақсаты – еңбек құқықтарын қорғау саласындағы заңнаманы жетілдіру және еңбек қауіпсіздігін басқару жүйесінің тиімділігін арттыру.
Заң жобасы аясында Еңбек кодексі мен «Халық денсаулығы және денсаулық сақтау жүйесі туралы» кодекске түзетулер енгізу қарастырылып отыр.
Атап айтқанда, Еңбек кодексіне сәйкес кәсіпорындарда бір лауазым шеңберінде ең жоғары және ең төменгі жалақы мөлшерінің арақатынасын ұжымдық шартта бекіту, келісу комиссиясының қызметіне медиаторды тарту, сондай-ақ азаматтық-құқықтық сипаттағы шартта еңбек қатынастарына тән кем дегенде бір белгі болған жағдайда мұндай шарт жасасуға тыйым салу нормаларын енгізу ұсынылады. Мәжіліс депутаты Асхат Аймағамбетовтың айтуынша, еңбекақы мөлшерінің шекті арақатынасын белгілеу отандық және шетелдік қызметкерлер арасындағы жалақы айырмашылығын төмендетуге мүмкіндік береді. “Мысалы, бірдей лауазымда бірдей жұмыс атқаратын қазақстандық және шетелдік мамандардың жалақысында үлкен айырмашылық бар. Біз дәл осы бір лауазымда жұмыс істейтін азаматтардың мәселесін шешуді көздеп отырмыз”, – деді ол. Сонымен қатар, құжатта әкелерге бала күтіміне байланысты берілетін демалыс мерзімін еңбек өтіліне енгізу қарастырылған. Ал “Халық денсаулығы және денсаулық сақтау жүйесі туралы” кодекске өндірістік жарақаттың ауырлық дәрежесін анықтау ережелерін бекіту жөніндегі уәкілетті органның құзыретін енгізу ұсынылуда.
