Астана. 19 қараша. ИНТЕРФАКС-ҚАЗАҚСТАН – Мәжіліс сәрсенбі күні өткен жалпы отырыста Қазақстан Республикасының Токио қаласында 2011 жылғы 26 қарашада қол қойылған Жоғары білім саласындағы біліктіліктерді тану жөніндегі Азия-Тынық мұхиты өңірлік конвенциясын (Токио конвенциясы) ратификациялау туралы заңын қабылдады.
Құжаттың мақсаты – дипломдар, академиялық дәрежелер мен өзге де біліктіліктерді тану рәсімін жеңілдету, оларды бағалауда ашықтық пен әділеттілікті қамтамасыз ету, сондай-ақ өңір елдері арасындағы академиялық және кәсіби ұтқырлықты кеңейту.
Конвенция ережесіне сәйкес, оған қатысушы мемлекеттер басқа елдерде берілген біліктіліктерді тануға міндеттенеді, егер олардың білім беру бағдарламаларында елеулі айырмашылықтар болмаса. Сонымен қатар, Конвенцияға қосылған әрбір мемлекетте жоғары білім туралы ақпарат беретін ұлттық ақпараттық орталықтар құру қарастырылған. Бұл орталықтар білім беру жүйелері мен аккредиттелген жоғары оқу орындары туралы сенімді деректермен алмасуды қамтамасыз етеді.
Қазақстан тарапынан Конвенцияны ратификациялау кезінде дәстүрлі емес оқыту үлгілері немесе ішінара оқу курстары негізінде алынған біліктіліктерді тануға қатысты бірқатар баптар бойынша ескертпе жасалды.
Қазіргі таңда Токио конвенциясының тараптары қатарында Ауғанстан, Армения, Австралия, Қытай, Фиджи, Қасиетті Престол, Жапония, Моңғолия, Жаңа Зеландия, Корея Республикасы, Ресей және Түркия бар.
