Астана. 3 желтоқсан. ИНТЕРФАКС-ҚАЗАҚСТАН – Қазақстан Республикасы Парламентінің Мәжілісі сәрсенбі күні өткен жалпы отырыста «Қазақстан Республикасы Үкіметі мен ОПЕК Халықаралық даму қоры арасындағы жеке секторда операциялар жүргізу жөніндегі Негіздемелік келісімді ратификациялау туралы» заңды қабылдады.
Аталған келісім 2024 жылғы қыркүйекте Астанада қол қойылған болатын.
Ұлттық экономика бірінші вице-министрі Азамат Әмриннің айтуынша, ОПЕК Халықаралық даму қоры қызметінің негізгі бағыттары: инфрақұрылымды дамыту және салу, азық-түлік қауіпсіздігін қамтамасыз ету, энергетикалық ауысымды қолдау, цифрландыру, инновациялар және шағын және орта бизнесті дамыту үшін экономикалық мүмкіндіктер жасау.
Вице-министрдің айтуынша, қор қаржыландыра алатын қызмет түрлеріне: коммерциялық және инвестициялық банктер, лизингтік және ипотекалық компаниялар, тікелей инвестициялар қорлары, микроқаржы ұйымдары және басқа да қаржы институттары жатады.
«Қарыз бойынша пайыздық мөлшерлемелер жылдық 2,5%-дан 5%-ға дейін, жеңілдік мерзімі 6 айдан 24 айға дейін, ал несие мерзімі 22 жылға дейін болуы мүмкін», – деді Әмрин.
Оның айтуынша, келісімді ратификациялау Қазақстандағы инвестициялық ахуалға оң әсер етеді және қордан тартылатын заем қаражаты еліміздің сыртқы мемлекеттік қарызына әсер етпейді.
Қор құрылғаннан бері өткен 49 жыл ішінде 125 мемлекетте 4 мыңнан астам жобаны жүзеге асыруға 30 миллиард АҚШ долларынан астам қаржы бөлген. Ал Орталық Азия елдеріне соңғы 20 жыл ішінде 1,4 миллиард доллардан астам инвестиция салынған.
Мәжілістің Экология және табиғатты пайдалану мәселелері комитетінің қорытындысына сәйкес, келісімнің мақсаты – инвестициялық жобаларды қаржыландыру үшін қор тарапынан қарыздар мен (немесе) кепілдіктер беру; қордың активтері мен табыстарын тікелей салықтардан босату; валютаны айырбастау және қаражатты аудару мүмкіндігін қамтамасыз ету; қордың мәртебесі мен құқықтық режимін айқындау, сондай-ақ оған артықшылықтар мен иммунитеттер беру болып табылады.
Сондай-ақ, келісімде қор мен оның бенефициарларының құқықтарын қорғау және дауларды арбитраж арқылы шешу тәртібі белгіленген.
Заң Сенаттың қарауына жолданады.
