Астана. 17 желтоқсан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев «Әкімшілік әділет, нормашығармашылық және заң көмегін ұйымдастыру мәселелері бойынша кейбір заңнамалық актілерге өзгерістер мен толықтырулар енгізу туралы» заңға қол қойды. Бұл туралы Мемлекет басшысының баспасөз қызметі хабарлады.
Заңның мақсаты – Әкімшілік рәсімдік-процестік кодекстің (ӘРПК) нормаларын жетілдіру, бірқатар істерді Азаматтық процестік кодекстен (АПК) әкімшілік әділет саласына көшіру, сондай-ақ адвокаттардың, нотариустардың, жеке сот орындаушыларының және сот сарапшыларының кәсіби қызметін реттеу.
Заң нормаларымен Үкіметке мемлекеттік органдар мен ұйымдар арасындағы дауларды шешу жөніндегі өкілеттіктер бекітіледі. Атап айтқанда, мұндай даулар сотқа дейінгі реттеу шеңберінде және республиканың Үкімет регламентіне сәйкес ӘРПК нормалары бойынша қаралатын болады. Бұл тетік сот жүйесіне түсетін жүктемені азайтуға, мемлекеттік аппараттың тиімді өзара іс-қимылын қамтамасыз етуге және мемлекеттік органдар тарапынан ведомстволық бақылауды оңтайландыруға бағытталған.
Мысалы, егер бір мемлекеттік орган екінші мемлекеттік органның шешімімен келіспесе, ол жоғары тұрған мемлекеттік органға әкімшілік шағым беруге құқылы. Ал жоғары тұрған органның шешімімен де келіспеген жағдайда, Үкімет аппаратына жүгіну мүмкіндігі беріледі.
Сонымен қатар заңда әкімшілік рәсімдерді жетілдіруге бағытталған бірқатар өзгерістер мен толықтырулар көзделген. ӘРПК-ге сәйкес, егер өтініштің мазмұны бұрын қаралып, әкімшілік рәсім тоқтатылған өтінішпен мәні жағынан бірдей болса және ол өтініш бұрын қаралған болса, әкімшілік орган немесе лауазымды тұлға мұндай өтінішті жауап бермей қайтаруға құқылы болады. Сондай-ақ тіркеуден кейін құрамында балағат сөздер бар, оның ішінде әкімшілік органның, оның қызметкерлерінің немесе лауазымды тұлғалардың атына бағытталған өтініштер де кері қайтарылады.
Адвокаттардың кәсіби стандарттарын арттыру, тәуелсіздігіне кепілдіктер беру және құқық үстемдігі қағидаттарына сәйкес олардың процестік құқықтарын қамтамасыз ету мақсатында «Адвокаттық қызмет және заң көмегі туралы» заңға да бірқатар түзетулер енгізіледі. Атап айтқанда, адвокаттық қызметпен айналысу лицензиясынан айыру тетігі нақтыланып, әділет органдары мен адвокаттар алқалары өкілеттіктерінің қайталануы мен артық рәсімдер жойылады.
Бұл түзетулер мемлекеттік бақылау мен адвокатураның кәсіби дербестігі арасындағы теңгерімді сақтау, адвокаттардың мемлекеттік құпияға қол жеткізу тәртібін сот төрелігінің өзге қатысушыларымен біріздендіру, сондай-ақ әділет органдарына түсетін әкімшілік жүктемені азайту мақсатында ұсынылған.
