Берлин. 19 желтоқсан. Интерфакс — Германияның орталық банкі екі жылға созылған тоқыраудан кейін ел экономикасы қайтадан өсу траекториясына шығады деп болжап отыр.
Жаңартылған болжамға сәйкес, 2025 жылы Германияның ішкі жалпы өнімі 0,2 пайызға өседі. Бұған дейін орталық банк экономикалық өсім нөл деңгейінде қалады деп күткен болатын.
Сонымен қатар реттеуші орган 2026 жылға арналған өсім болжамын 0,1 пайыздық тармаққа төмендетіп, 0,6 пайыз деңгейінде қалдырды. Ал 2027 жылға арналған болжам керісінше 0,1 пайыздық тармаққа арттырылып, 1,3 пайызға жеткізілді.
«Алғашқы кезеңде ілгерілеу баяу болады, алайда кейін біртіндеп қарқын алады. 2026 жылдың екінші тоқсанынан бастап экономикалық өсім айқын күшейеді, бұл ең алдымен мемлекеттік шығыстардың артуы мен экспорттың қалпына келуі есебінен жүзеге асады», — деді Бундесбанк басшысы Йоахим Нагель.
Айта кету керек, келесі жылға арналған болжам жұмыс күндерінің саны көбірек болатыны ескеріліп түзетілген. Егер бұл түзету қолданылмаса, экономикалық өсім 0,9 пайызды құрар еді.
Бундесбанк Германиядағы инфляция деңгейі биыл 2,3 пайыз болады деп болжайды, ал келесі жылы ол 2,2 пайызға дейін баяулайды.
Сондай-ақ реттеушінің бағалауынша, Германия бюджетінің тапшылығы 2028 жылға қарай екі есеге жуық артып, биылғы 2,5 пайыздан 4,8 пайызға дейін жетеді. Осы кезеңде мемлекеттік қарыз көлемі ішкі жалпы өнімнің 62 пайызынан 68 пайызына дейін өседі.
