Астана. 19 желтоқсан. Интерфакс-Қазақстан — Қазақстан Президенті Қасым-Жомарт Тоқаев Mitsui компаниясының Қазақстан экономикасының негізгі салаларындағы қатысуын кеңейтуге мүдделі екенін мәлімдеді. Бұл туралы Мемлекет басшысының баспасөз қызметі хабарлады.
Баспасөз қызметінің мәліметінше, жұма күні Токиоға сапармен барған Тоқаев Mitsui компаниясы директорлар кеңесінің төрағасы Тацуо Ясунагамен кездесу өткізді.
Мемлекет басшысы Mitsui басшылығына Қазақстандағы белсенді қызметі және Жапониямен экономикалық ынтымақтастықты нығайтуға қосқан үлесі үшін алғыс білдіріп, «Mitsui компаниясының Қазақстан экономикасының негізгі секторларындағы қатысуын кеңейтуге мүдделілік» бар екенін атап өтті. Атап айтқанда, Президент компанияның Астанада жабдықтарды күрделі жөндеу және қалпына келтіру жөніндегі өндірістік кешен салу жобасына қатысу жоспарларын қолдады.
«Өзара қызығушылық тудыратын бағыттар қатарына сондай-ақ аса маңызды минералдар, көлік пен логистика, табиғи апаттардың алдын алуға бағытталған технологияларды енгізу салалары жатады», — делінген хабарламада.
Қазақстан Президентінің Токиоға сапары аясында Mitsui компаниясымен Қазақстанда бірқатар бірлескен жобаларды іске асыру жөніндегі меморандумдарға қол қою жоспарланып отыр.
Mitsui — сауда (Mitsui & Co.), теңіз тасымалы (Mitsui O.S.K. Lines), химия (Mitsui Chemicals), металлургия (Mitsui Mining & Smelting) және қаржы салаларын (Sumitomo Mitsui Banking Corporation) қамтитын, әртүрлі салаларда жұмыс істейтін дербес компаниялардан тұратын Жапониядағы ірі қаржы-өнеркәсіптік топтардың бірі.
