Вашингтон. 27 желтоқсан. ИНТЕРФАКС – АҚШ Мемлекеттік хатшысы Марко Рубио Йемендегі жағдайдың ушығуына байланысты алаңдаушылық білдіріп, тараптарды ұстамдылық танытуға және жағдайды реттеу мақсатында дипломатиялық күш-жігерді күшейтуге шақырды.
«АҚШ Йеменнің оңтүстік-шығысындағы соңғы оқиғаларға алаңдап отыр. Біз сабыр сақтауға және жағдайды тұрақтандыру үшін дипломатиялық әрекеттерді жалғастыруға үндейміз», – делінген Рубионың АҚШ Мемлекеттік департаментінің сайтында жарияланған мәлімдемесінде.
Мемлекеттік хатшы Вашингтон Сауд Арабиясы мен Біріккен Араб Әмірліктеріне «дипломатиялық көшбасшылығы үшін» алғыс білдіретінін атап өтіп, АҚШ «қауіпсіздік саласындағы ортақ мүдделерді ілгерілетуге бағытталған барлық бастамаларды қолдайтынын» растады.
Бұған дейін Йемендегі әскери-саяси жағдайдың ушығуына байланысты алаңдаушылық білдіргенін Ресей Сыртқы істер министрлігінің ресми өкілі Мария Захарова да мәлімдеген болатын.
«Мәскеу Йеменнің Хадрамаут пен Махра оңтүстік провинцияларында үкіметті қолдайтын күштер құрамындағы әртүрлі жасақтар, соның ішінде Оңтүстік өтпелі кеңеске бағынатын құрылымдар арасындағы қақтығыстар салдарынан әскери-саяси жағдайдың ушығуына алаңдаулы», – делінген Захарованың Ресей СІМ сайтында жарияланған хабарламасында.
Ол сондай-ақ барлық тараптарды ұстамдылық танытуға және бар проблемалар мен қайшылықтарды конструктивті ішкійемендік диалог аясында өзара қабылданатын ымыралы шешімдер арқылы еңсеруге шақырды.
