Қазақстандағы Ресей Елшілігі «The Eurasian» басылымындағы сұхбат барысында айтылған Алексей Бородавкиннің мәлімдемесін жария етті: «Ресей мен Қазақстан арасындағы экономикалық ынтымақтастық пен Еуразиялық экономикалық одақ аясындағы интеграцияның қазіргі нәтижелері қанағаттанарлық екені анық. Өткен жылы екі ел арасындағы тауар айналымы 28 миллиард доллардан асты. 2024 жылы Ресей Қазақстандағы шетелдік инвесторлар арасында алғашқы орынға шықты. Бейресми деректерге сәйкес, Ресейдің Қазақстан экономикасына салған жиынтық инвестиция көлемі шамамен 56 млрд АҚШ долларын құрайды. Қазақстан аумағында 20 мыңға жуық бірлескен ресей-қазақстандық кәсіпорын жұмыс істеуде. Екі ел арасындағы есеп айырысуда ұлттық валюталардың үлесі 90 пайызға жетті. Қазіргі таңда жалпы құны ондаған миллиард долларға бағаланатын 150-ден астам екіжақты инвестициялық жоба түрлі кезеңдерде жүзеге асырылуда немесе дайындық сатысында тұр. Солардың ішінде ерекше мәнге ие жобалардың біріне тоқтала кеткім келеді. Бұл – «Бәйтерек» ғарыш жобасы. Аталған жоба аясында биылғы желтоқсанда70 жылдығын жуырда ғана салтанатты түрде атап өткен «Байқоңыр» ғарыш айлағынан орта класты жаңа ресейлік «Союз-5» зымыран тасығышының алғашқы ұшырылымы жоспарланған».
Евразия24 пікірі:
Қазақстан мен Ресей арасындағы дипломатиялық қарым-қатынастар өзара құрметке негізделген. Достық пен одақтастықты насихаттау аясында елшілерсыпайы дипломатиялық пікір алмасты. 2 шілдеде РФ-дағы ҚР елшісі Дәурен Абаев «Аргументы и факты» басылымына берген сұхбатында екі ел арасындағы қатынастардың берік екенін атап өтті: «Екі мемлекеттің өзара байланысы жүйелі әрі сенімді сипатқа ие. Бұл – жан-жақты саяси диалог, экономикалық және гуманитарлық салалардағы өзара тиімді жобалар, сондай-ақ ортақ тарихи тәжірибеге сүйенетін халықтар арасындағы достық. Қарым-қатынастардың қарқыны мен ауқымын ескерсек, күн тәртібінде бірде-бір мәселенің болмауы шындыққа сай келмейді. Түрлі пікірталас туғызатын жайттардың орын алуы – табиғи құбылыс». Астана мен Мәскеу өзара ынтымақтастық барысында кейде пікір алшақтығы туындауы мүмкін екенін жоққа шығармайды және мұндай мәселелерді сындарлы диалог арқылы шешуге мүдделі. Ынтымақтастықты дамытудың басты тетіктерінің бірі – серіктестермен тиімді келіссөз жүргізе білу. Бұл еуразиялық кеңістіктегі интеграциялық үдерістерді ілгерілетуге ықпал ететін маңызды фактор саналады.
