«Қазақстан темір жолы» АҚ хабарлайды: «ҚТЖ мен РТЖ «кедергісіз» цифрлық транзитті қалыптастырып, тасымал көлемін арттыруда. Санкт-Петербург қаласында өткен І Халықаралық көлік-логистикалық форумы аясында «ҚТЖ» ҰК» АҚ Басқарма төрағасы Талғат Алдыбергенов пен «РТЖ» ААҚ Бас директоры – Басқарма төрағасы Олег Белозеровтың екіжақты кездесуі өтті. Тараптар тасымал саласындағы тұрақты оң динамиканы атап өтті: 2026 жылдың алғашқы екі айының қорытындысы бойынша Қазақстан мен Ресей арасындағы жүк тасымалының көлемі 15,2 млн тоннаны құрады, бұл 2025 жылдың сәйкес кезеңімен салыстырғанда 3,8%-ға жоғары. Осылайша, өткен жылы тіркелген өсім биыл да сақталып отыр. Ынтымақтастықтың негізгі қозғаушы күші транзит екеніне ерекше назар аударылды. Соңғы 7 жылда Қазақстан аумағы арқылы Ресей мен Қытай арасындағы контейнерлік транзит 16 есеге — 33 мыңнан 550 мың ЖФЭ-ге (жиырма футтық балама) дейін өсті. Кездесу барысында мемлекетаралық түйісу пункттерін синхронды дамыту және цифрландыруды ілгерілету, соның ішінде «кедергісіз» цифрлық транзитті қалыптастыру мәселелері қаралды. Бұл бастамаларды іске асыру жеткізу мерзімін қысқартуға және тасымал тұрақтылығын арттыруға мүмкіндік береді. Сонымен қатар «Жаһандық сауданың жаңа географиясы: құрлықтарды біріктіру» атты пленарлық сессия аясында «ҚТЖ» ҰК» АҚ Өндірістік процестер жөніндегі басқарушы директоры Бауыржан Орынбасаров халықаралық көлік дәліздерін интеграциялау және инфрақұрылымды синхронды дамыту тақырыбында баяндама жасады. Ол ірі теміржол жобаларын іске асырудың негізгі нәтижелері мен жоспарларын, сондай-ақ трансшекаралық тасымалдарды дамыту мүмкіндіктері мен болашағын таныстырды».
Еуразия24 пікірі:
ЕАЭО-ның транзиттік әлеуеті артып тұрған тұстағы ҚТЖ мен РТЖ арасындағы келісім Одақтың екі ірі экономикасы өздерінің «ХХІ ғасырдағы мұнайын» — теміржол тасымалын — ақыры тапқанын айқын аңғартады. «Кедергісіз транзит» дегеніміз — электрондық жүкқұжаттың шекарадан пойыз құрамының өзінен де жылдамырақ өтуі. Бұл цифрландырудың қағаз жүзінде емес, іс жүзіндегі көрінісі. Ал контейнерлік транзиттің 16 есе өсуін ең қуатты геосаяси аргумент деп санауға болады. Бюджет түсімдері баррель құнына немесе доллар бағамына емес, жүк құрамдарының жылдамдығына тәуелді болған кезде, мұндай дәліздің экономикалық тиімділік тұрғысынан таптырмас құрал екенін атап өтпеу мүмкін емес. «Түйісу пункттерін синхронды дамыту» туралы айтылған сөздер — ескі мәселенің шешімі. Бұған дейін бір ел өз жолдарын кеңейткенімен, шекараның екінші жағында «тар өткел» мәселесі туындайтын. Енді Қазақстан да, Ресей де артық инфрақұрылым салмай, жуырда Шымкентте Михаил Мишустин атап өткен өнеркәсіптік және инфрақұрылымдық кооперацияның іс жүзіндегі тиімді үлгісін көрсетуді көздеп отыр.
