Мемлекет басшысы Қасым-Жомарт Тоқаев азаматтар тарапынан түскен шағымдарға байланысты Үкіметтің назарын Алакөл көлінің маңындағы туристік инфрақұрылымның төмен деңгейіне аударды. Бұл туралы Ақорда ресми хабарлады.
Атап айтқанда, өңірде тиісті туристік инфрақұрылымның жоқтығы, қызмет көрсету сапасының төмендігі мен қауіпсіздік шараларының жеткіліксіздігі сынға ілікті.
Мемлекет басшысы Үкіметке еліміздегі барлық туристік нысандардың жағдайын жедел түрде ретке келтіруді тапсырды. Сонымен қатар жауапты тұлғалардың әрекетіне құқықтық баға беріп, кінәлі лауазымды тұлғаларды жауапкершілікке тарту қажеттігін қадап айтты.
Евразия24 пікірі:
Бұл бұрыннан келе жатқан мәселе. Мемлекет басшысының Алакөл жағалауындағы инфрақұрылым мен қызмет көрсету сапасына қатысты сыны – алғаш рет көтеріліп отырған мәселе емес. Бұған дейін де Президент Үкіметке осы өңірдегі туристік жағдайды ретке келтіруді бірнеше мәрте тапсырған болатын.
«Қазіргі жағдайда туризм индустриясы – экономикалық өсімнің маңызды драйвері әрі жаңа жұмыс орындарын құрудың көзі. Мемлекеттік туризмді дамыту бағдарламасы аясында анықталған 10 басым туристік орталықтың бірі ретінде Алакөл жағалауы жыл сайын 2 миллионнан астам турист тартуға қауқарлы. Өткен жылы көптеген қазақстандық демалыс орны ретінде Алакөлді таңдады, алайда сервистік қызметтердің төмендігі мен жол инфрақұрылымының нашарлығы жиі сынға алынды. Жергілікті тұрғындар мен қонақтар жолдардың сын көтермейтін жай-күйіне наразылық білдірді. Осыған орай, Шығыс Қазақстан және Алматы облыстарының әкімдеріне авто жолдарды жөндеу және сервистік қызмет сапасын жақсарту жұмыстарын жеделдету тапсырылды», – делінген атқарушы билікке бағытталған бұған дейінгі ескертуде. 2019 жылғы 26 сәуірдегі ШҚО-дағы халықпен кездесуде Қасым-Жомарт Тоқаевтың айтқан сөзіне алты жыл өтті, алайда жергілікті атқарушы органдар мен салалық министрлік тарапынан нақты іс-шаралар қолға алынбаған.
