Ақорда хабарлайды: «БҰҰ өкілдері Өңірлік экологиялық саммиттің ұйымдастырылу деңгейіне, сондай-ақ оның пленарлық отырысында Қазақстан Президентінің сөйлеген сөзіне жоғары баға берді (…) Мемлекет басшысы БҰҰ аясында Халықаралық су ұйымын құру бастамасына бейілділігін растады, сондай-ақ Алматы қаласында орналасқан Орталық Азия мен Ауғанстанға арналған Тұрақты даму мақсаттары жөніндегі БҰҰ өңірлік орталығының өңірлік өзара іс-қимылдың негізгі алаңы ретіндегі маңызын атап өтті. Қорытындысында Президент еліміздің тұрақты даму, тұрақтылық және ортақ өркендеу мүддесі жолында БҰҰ жүйесімен ынтымақтастықты одан әрі нығайтуға дайын екенін жеткізді».
Еуразия24 пікірі:
Саммитке Астанада қатысқан делегаттар құрамында БҰҰ Бас хатшысының экономикалық және әлеуметтік мәселелер жөніндегі орынбасарлары, даму бағдарламасы бойынша өкілдер, Еуропалық экономикалық комиссияның атқарушы хатшысы, апат тәуекелдерін азайту жөніндегі арнайы өкіл, Дүниежүзілік метеорологиялық ұйымның бас хатшысы, ФАО бас директорының орынбасары, сондай-ақ климаттың өзгеруі жөніндегі сарапшылар тобының төрағасы болғанын ескерсек, жиынның күн тәртібіндегі мәселелер тек экологиямен шектелмегенін байқауға болады. Бұл Орталық Азиядағы күрделі климаттық жағдайды, сондай-ақ БҰҰ мен оның құрылымдарының су тапшылығы, ауыл шаруашылығы өнімділігінің төмендеуі және инфрақұрылымның экологиялық талаптардан артта қалуы мәселелеріне алаңдаушылығын ескергенде ерекше маңызды. Саммиттің Қазақстанда өтуі де оның маңызын арттыра түседі. Соңғы жылдары еліміз Біріккен Ұлттар Ұйымы қолдап отырған бірқатар бастамаларды ілгерілетіп келеді.
