Қазақстан Республикасы Президентінің жанындағы Орталық коммуникациялар қызметі хабарлайды: «Мемлекет басшысы ауыл шаруашылығына цифрлық технологияларды енгізу жұмыстарын жеделдетуді тапсырды. Сонымен қатар, Президент мал шаруашылығының әлеуетін толық ашу қажеттігін атап өтті. «Жыл соңына дейін мал шаруашылығын дамытудың арнайы бағдарламасы әзірленеді. Бұл құжат ұзақ мерзімге жеңілдетілген қаржы тартуға мүмкіндік береді. Экономиканың барлық саласында ашықтық пен тиімділікке толық цифрландыру арқылы ғана қол жеткізе аламыз. Бұл мәселе жөнінде мен Жолдауымда арнайы тоқталдым. Ауыл шаруашылығында цифрлық технологияларды енгізу үдерісін жеделдету қажет. Өсімдік және мал шаруашылығындағы барлық процесті толық бақылау үшін цифрлық әдістерді қолдану қажет. Осы бағыттағы жұмысты IT-бизнес өкілдерімен тығыз ынтымақтастықта жүргізу аса маңызды», – деді Мемлекет басшысы».
Евразия24 пікірі:
Жасанды интеллект пен ауыл шаруашылығы – әзірге үйлесе қоймаған қос ұғым сияқты көрінеді. Себебі цифрландыру жүргізу үшін алдымен нақты нысандар болуы керек, ал Қазақстанның агросекторы ондаған жыл бойы бір мәселелердің айналасынан шыға алмай келеді. Дәл осыдан бір жыл бұрын Halyk Finance сарапшысы Санжар Қалдаров 2029 жылға дейінгі Қазақстанның жаңа Ұлттық даму жоспарын сараптай отырып, былай деп жазған болатын: «Жалпы, құжатта аграрлық сектордағы көптеген өзекті мәселе қысқа да нұсқа түрде нақты сипатталғанын атап өткен жөн. Олардың қатарында саланың өнімділігінің төмендігі, еңбекақының аздығы, суармалы жерлердің баяу ұлғаюы, топырақ сапасының нашарлауы, суды пайдалану тиімділігінің төмендігі, көлік-логистика инфрақұрылымының әлсіз дамуы, ауыл шаруашылығы кооперациясының жеткіліксіздігі және материалдық-техникалық жабдықталу деңгейінің төмендігі бар. Аталған түйткілдердің 80 пайызы цифрландырудың әлсіздігімен байланысты емес. Бұл – виртуалды емес, нақты мәселелер: қаражаттың, техниканың және білікті мамандардың жетіспеушілігі. Бір жылда жағдай түбегейлі өзгерді деу қиын. Бұл ретте Ауыл шаруашылығы министрлігінің жұмысы оңай емес: Президент тапсырмасын орындау қажет, алайда мұны жүзеге асыруда бірқатар шектеу бар. Кейбір өңірлерде интернет қолжетімсіз, ал көптеген орта және шағын шаруашылықтар әлі де ескірген техникаға немесе қол еңбегіне тәуелді.
