АСТАНА. 17 қыркүйек. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев Астанада өткен Дүниежүзілік және дәстүрлі діндер көшбасшыларының VIII съезінде жасанды интеллектті (ЖИ) дамытуға қатысты әмбебап этикалық қағидаттарды әзірлеу жөніндегі халықаралық комиссия құруды ұсынды.
«Жасанды интеллекттің дамуына қатысты жауапкершілікпен қарауды қамтамасыз ететін әмбебап қағидаттар жиынтығын әзірлейтін халықаралық этика комиссиясын құруды ұсынамын. Бұл — шешім қабылдау барысында адам қадір-қасиетін құрметтеу, сондай-ақ кемсітушілікке жол бермеу сынды қағидаларға негізделген өзіндік “алгоритмдерге арналған өсиет” болуы тиіс», — деді Мемлекет басшысы съезд отырысында сөйлеген сөзінде.
Президенттің айтуынша, жасанды интеллект, үлкен деректер, биоинженерия және басқа да серпінді технологиялар даму барысын түбегейлі өзгертіп жатыр, алайда олармен байланысты этикалық нормалар бұл қарқынды ілесе алмай отыр.
«Қазіргі таңда таңдау еркіндігі мен жеке өмірге қол сұқпау, цифрлық теңдік пен қауіпсіздік, сондай-ақ жасанды интеллект пен басқа да технологияларды қолдану секілді жаңа сын-қатерлер туындап отыр», — деді Тоқаев.
Оның пікірінше, адамзаттың цифрлық болашағы туралы пікірталастарға жалпыадамзаттық моральдық құндылықтар мен идеалдар да енуі тиіс.
«Кез келген технология адам игілігіне қызмет етуі қажет. Бұл үшін дін қайраткерлері, ғалымдар мен инженерлер арасында тұрақты диалог орнату маңызды», — деп түйіндеді Қазақстан Президенті.
