АСТАНА. 17 қыркүйек. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев Дүниежүзілік және дәстүрлі діндер көшбасшыларының съезі аясында Мәскеу және бүкіл Русь патриархы Кириллмен кездесу өткізді. Бұл жөнінде Мемлекет басшысының баспасөз қызметі хабарлады.
Кездесу барысында Қасым-Жомарт Тоқаев патриарх Кириллге съездің жұмысына қатысқаны үшін алғыс білдіріп, Қазақстан мен Ресейдің стратегиялық әріптес әрі одақтас мемлекеттер екенін атап өтті.
Мемлекет басшысы екі ел халқы арасындағы рухани байланысты нығайтуға қосқан зор үлесі үшін және ерекше құрметтің белгісі ретінде патриарх Кириллді Қазақстан Республикасының ең жоғары мемлекеттік наградасы — «Алтын Қыран» орденімен марапаттады.
