Kazinform хабарлайды: Қазақстан Үкіметінің жаңа құрамы жасақталды. Министрлер кабинетінің негізгі мүшелерінің басым бөлігі қызметінде қалды, ал бірқатар министрлікке жаңа басшылар тағайындалды. Үкіметтің жаңа құрамын жасақтау Олжас Бектеновтің Премьер-министр қызметіне қайта тағайындалуынан басталды. (…) Вице-премьерлер құрамында айтарлықтай өзгеріс болған жоқ.
Премьер-министрдің бірінші орынбасары Нұрлыбек Нәлібаев Үкіметтегі қызметін жалғастырады. Премьер-министрдің орынбасары – Үкімет аппаратының басшысы Ғалымжан Қойшыбаев та қызметінде қалды. Қанат Бозымбаев та Премьер-министрдің орынбасары қызметін жалғастырады. Серік Жұманғарин Премьер-министрдің орынбасары – Ұлттық экономика министрі қызметіне қайта тағайындалды. Жаслан Мәдиев Премьер-министрдің орынбасары – Жасанды интеллект және цифрлық даму министрі қызметін сақтап қалды.
Осылайша, енді әлеуметтік саланы үйлестіретін Премьер-министр орынбасарын тағайындау қалды. Бұған дейін бұл қызметті Аида Балаева атқарған. Ол 31 тамызда Қауіпсіздік Кеңесі төрағасының орынбасары болып тағайындалды.
(…) Министрлердің басым бөлігі бұрынғы қызметтерінде қалды. (…) Негізгі кадрлық өзгерістердің бірі — Мұхтар Тілеубердінің Сыртқы істер министрі қызметіне қайта оралуы. Ол бұл лауазымға 2025 жылғы қыркүйекте тағайындалған Ермек Көшербаевтың орнына келді. (…)
Тағы бір жаңа тағайындау — Төтенше жағдайлар министрлігін Мұрат Мұханов басқарды. Ол осыған дейін ведомствоны басқарған Шыңғыс Әріновтің орнына тағайындалды. (…)
Экология және табиғи ресурстар министрлігінде де басшылық ауысты. Министр қызметіне Әлібек Қуантыровтағайындалып, осы лауазымды атқарған Ерлан Нысанбаевты алмастырды. (…)
Мәдениет және ақпарат министрі болып Арман Қырықбаев тағайындалды. Ол 2025 жылдан бері Қазақстан Президентінің ішкі саясат және коммуникациялар мәселелері жөніндегі көмекшісі қызметін атқарған.
Еуразия24 пікірі:
Біздің ойымызша, Үкіметтің жаңа құрамы жаңа бағыттың басталғанын емес, бұған дейін қолға алынған саясаттың жалғасатынын аңғартады. Қазіргі кадрлық шешімдердің басты саяси мәні де осында. Премьер-министрдің және негізгі вице-премьерлердің түгелге жуық қызметінде қалуы саяси өзгерістерден кейін экономикалық және әлеуметтік саясатты қайта-қайта жаңарту көзделмегенін көрсетеді. Министрлер кабинетіне осыған дейін атқарған жұмысын жалғастыруға мүмкіндік берілді. Оның нәтижесі үшін Үкіметтен жауап та сұрала бастады.
Олай деуге негіз бар. Үкімет 2024 жылы бекітілген 2029 жылға дейінгі Ұлттық даму жоспарын, сондай-ақ оның мақсаттарына қол жеткізуге арналған 2025-2026 жылдарға арналған Үкіметтің іс-қимыл бағдарламасын жүзеге асырып келеді. Бұл құжаттарда жалпы сипаттағы стратегиялық бағыттар ғана емес, нақты міндеттер белгіленген. Олардың қатарында экономикалық өсімді жеделдету, инвестиция тарту, өнеркәсіп пен инфрақұрылымды дамыту, энергетиканы жаңғырту, цифрландыру, білім беру мен денсаулық сақтау сапасын арттыру, өңірлер мен әлеуметтік саланы дамыту бар.
Үкімет құрамы негізінен сақталғандықтан, ендігі жерде туындаған мәселелерді бұрынғы басшылардан қалған жағдаймен түсіндіру қиындай түседі. Әсіресе мұнай бағасы жоғары болғанына қарамастан бюджет тапшылығы сақталып отырған тұста қаржы-экономикалық блоктың алдағы жұмысы ерекше назар аудартады.
Бірнеше министрдің ауысуын жүйедегі қалыпты кадрлық жаңару деп бағалауға болады. Оның үстіне кейбір ведомстволарда басшылардың жиі ауысуы бұрыннан қалыптасқан жағдай. Бұл әсіресе жұмысы күрделі әрі үнемі жоғары жауапкершілікті талап ететін экология, төтенше жағдайлар, ал жекелеген кезеңдерде сыртқы саясат салаларына қатысты.
Аида Балаеваның Қауіпсіздік Кеңесіне ауысуынан кейінгі Мәдениет және ақпарат министрлігіндегі өзгеріс бұдан сәл өзгеше сипатта. Арман Қырықбаев бұған дейін Президенттің ішкі саясат және коммуникациялар мәселелері жөніндегі көмекшісі қызметін атқарған тәжірибелі саясаткер. Сондықтан бұл тағайындау мәдениет, ақпарат және ішкі саясат бағыттары арасындағы байланысты күшейтуге бағытталуы мүмкін.
