Zakon.kz хабарлауынша: «2026 жылғы 13 мамырда Мәжілістің пленарлық отырысында депутат Татьяна Савельева Проблемалық кредиттер қоры қызметінің тиімділігі төмен екенін мәлімдеді. Ол Премьер-Министр Олжас Бектенов атына жолдаған депутаттық сауалында мемлекеттік аудит нәтижелері негізінде халық қалаулыларының «Проблемалық кредиттер қоры» АҚ-ның стресс-активтерді басқару және бюджет қаражатын пайдалану тиімділігі бағытындағы қызметіне талдау жүргізгенін айтты. «ПКҚ арқылы жүзеге асырылған шаралар дағдарыстан кейінгі кезеңде банк секторының тұрақтылығын сақтауға белгілі бір деңгейде ықпал етті. Алайда қазіргі таңда бұл құрылымның жұмыс моделін түбегейлі қайта қарау қажет», – деді депутат. Оның айтуынша, 2012 жылы уақытша дағдарысқа қарсы құрал ретінде құрылған Проблемалық кредиттер қоры қызметін аяқтаудың нақты мерзімдері айқындалмастан жұмысын жалғастырып келеді. Ал халықаралық тәжірибеде мұндай құрылымдар уақытша сипатқа ие болып, мемлекеттің капиталдан кезең-кезеңімен шығу жоспары нақты белгіленеді (…) Сонымен қатар, депутаттың мәліметінше, мемлекеттік жоспарлау жүйесінде ПКҚ-ның өзі үшін де, Қаржы министрлігі үшін де тиімділіктің нақты өлшенетін көрсеткіштері (KPI) қарастырылмаған. Сондай-ақ келісімшарттардың орындалуын бақылау формалды сипатта қалып, ішкі нормативтік база ескірген».
Еуразия24 пікірі:
Проблемалық кредиттер қорын жою туралы ұсыныс тастаған депутат Татьяна Савельеваның сөзінде негіз бар. Экономика және қаржы министрліктеріндегі мол тәжірибесін ескерсек, мәжіліс депутаты үкіметке қоғамды көптен бері толғандырып жүрген орынды сауалдар қойды. Кез келген дағдарысқа қарсы құрылым инерциямен жұмыс істей бермеуі тиіс. Ал оның жұмыс мерзіміне, тиімділік көрсеткіштеріне (KPI) және ашықтығына қатысты нақты деректердің жоқтығы — көмекке мұқтаж емес жүйені жасанды түрде қолдауды тоқтатуға толық негіз болады. Көптеген елдерде қаржы секторындағы ауқымды реформалар дәл осындай тексерістер мен парламенттік талқылаулардан басталған. Сондықтан бұл сынды әлсіздіктің белгісі емес, керісінше, Қазақстанның қаржы жүйесі «қолмен басқару» режимінен заманауи, ашық және нарықтық модельге біртіндеп көшіп жатқандығының көрсеткіші деп ұғынған жөн. Ұзақ мерзімді перспективада бұл қадамдар инвестициялық ахуалды жақсартуға, бизнестің сенімін нығайтуға және жалпы экономиканың тұрақтылығын арттыруға қызмет етеді.
