Вашингтон. 1 тамыз. INTERFAX – АҚШ президенті Дональд Трамп Канададан әкелінетін тауарларға кедендік баж салығын 25%-дан 35%-ға дейін көтеру туралы жарлыққа қол қойды. Бұл туралы Ақ үйдің ресми мәлімдемесінде айтылды.
«Президент Дональд Трамп 2025 жылдың 1 тамызынан бастап Канада үшін кедендік тариф мөлшерлемесін 35% деңгейіне дейін арттыруды көздейтін жарлыққа қол қойды», – делінген құжатта.
АҚШ әкімшілігінің мәлімдеуінше, Трамптың бұл әрекеті Канаданың фентанил затын заңсыз жеткізу ағынын тежеу бойынша ынтымақтастықтан бас тартуына, сондай-ақ президенттің осы ерекше әрі төтенше қатерді жою жөніндегі қадамдарына жауап ретінде АҚШ-қа қарсы қабылданған шараларға жауап болды.
Сонымен қатар, АҚШ-Мексика-Канада арасындағы еркін сауда жөніндегі келісім (USMCA) аясында преференциялық режиммен жеткізілетін тауарлар жаңа тарифке жатпайтыны нақты көрсетілген.
Бұдан бөлек, жаңа баж салығын айналып өту мақсатында басқа елдер арқылы транзитпен жеткізілетін тауарларға 40% мөлшерінде қосымша салық салынатыны ескертілген.
Бұл ретте Онтарио провинциясының премьер-министрі Даг Форд Вашингтонның шешімін «алаңдатарлық қадам» деп бағалап, Канада билігін АҚШ-тың болат және алюминий өнімдеріне 50%-дық жауаптық тариф енгізуге шақырды.
«Канада әділ келісімге ғана келісуі керек. Қазір кері шегінетін уақыт емес. Біз өз ұстанымымыздан таймауымыз қажет», – деп жазды Форд әлеуметтік желідегі парақшасында.
