Вашингтон, 1 тамыз. INTERFAX – CNN арнасының хабарлауынша, палестиналық ХАМАС қозғалысы Газада тұрақты бітім орнату және Израиль әскерін толық шығару жөніндегі келіссөздерді жалғастыруға дайын екенін мәлімдеді. Алайда бұл ниет гуманитарлық жағдайдың айтарлықтай жақсаруы мен қарсы тараптан жазбаша жауаптың берілуі сияқты бірқатар талаптармен шартталған.
«Қарсы тарап біздің әрекеттерімізге ресми жазбаша жауап беріп, қазіргі гуманитарлық апатты жағдайды жақсартпайынша, келіссөздерге оралу мүмкін емес», – деді ХАМАС саяси бюросының мүшесі Басем Наим CNN арнасына берген сұхбатында.
Оның айтуынша, «қазіргі ашаршылық жағдайында келіссөздерді жалғастырудың мәні мен тиімділігі жоқ».
Бұған дейін телеарна дереккөздерге сілтеме жасай отырып, ХАМАС қозғалысы бітімге келу және тұтқындарды босату бойынша барлық келіссөздерге қатысуды тоқтатқанын хабарлаған болатын.
Айта кетейік, осыған дейін АҚШ пен Израиль өз делегацияларын келіссөздер өтіп жатқан Катар астанасы Дохадан кері қайтарып алды. АҚШ президентінің арнайы өкілі Стив Уиткофф ХАМАС-ты келіссөздер жүргізуде жауапсыздық танытты деп айыптаған еді.
