ВАШИНГТОН. 19 қараша. ИНТЕРФАКС – CBS телеарнасының хабарлауынша, АҚШ Әскери-теңіз күштерінің атомдық әуе тасығышы USS Gerald Ford Кариб теңізінде, Венесуэлаға әуедегі соққы жасау радиусында орналасқан.
Newsweek басылымы кеменің Пуэрто-Риконың оңтүстігінде жүргенін хабарлады. Еуропалық спутниктік түсірілімдерге сәйкес, әуе тасығыш АҚШ-тың осы аумағынан 240 км қашықтықта қозғалып жүр. Венесуэланың астанасы Каракастан бұл қашықтық шамамен 600 км.
USS Gerald Ford бортында 48 дана F/A-18 Hornet жойғыш ұшағы бар. Бұл ұшақтардың жауынгерлік радиусы – 720 км.
Әуе тасығыштан бөлек, Кариб теңізінде екі зымыранды крейсер, бес эсминец пен Tomahawk қанатты зымырандарымен қаруланған әскери-теңіз тобы орналасқан. Сондай-ақ үш мың теңіз жаяу әскерін тасымалдайтын үш ірі десанттық кемеден тұратын амфибиялық-десанттық топ жұмылдырылған. Пуэрто-Рикодағы әскери базаға он F-35B бесінші буын жойғышы, барлау ұшақтары және әуе жанармай құю ұшақтары шоғырландырылған.
Сонымен қатар, The Wall Street Journal газеті Ақ үйдің жоғары лауазымды өкіліне сілтеме жасап, АҚШ билігі әлі Венесуэлаға қарсы әскери операция жүргізу туралы түпкілікті шешім қабылдамағанын хабарлады.
«Жексенбі күні әкімшілік өкілдерінің бірі Венесуэла аумағындағы әскери іс-қимылдар міндетті түрде басталады деуге негіз жоқ екенін айтты», – деп жазады басылым.
Тағы екі америкалық шенеунік президент Дональд Трамптың әлі шешім қабылдамағанын, яғни Венесуэла президенті Николас Мадуроны биліктен тайдыру үшін шабуылға көшу-көшпеу жағы белгісіз екенін мәлімдеді. Олардың айтуынша, өткен аптада Қорғаныс министрі Пит Хегсет Трампқа бірнеше сценарий ұсынған. Олардың қатарында арнайы жасақтарды жұмылдыру және үкіметтік нысандар мен әскери инфрақұрылымға әуе шабуылдарын ұйымдастыру нұсқалары болған.
