Токио. 15 қазан. ИНТЕРФАКС – Бейсенбі күні Азия-Тынық мұхиты аймағындағы қор индекстері технологиялық компаниялар акцияларының арзандауына байланысты төмендеп жатыр.
Бір күн бұрын АҚШ қор нарығында да осындай жағдай байқалған. Сарапшылардың айтуынша, қарыз қаражатының қымбаттауы жасанды интеллект саласына ауқымды инвестиция құйып жатқан технологиялық компаниялардың несие алу мүмкіндіктеріне кері әсер етуі ықтимал.
«Жасанды интеллект саласында жұмыс істейтін компаниялардың қаржылық жағдайы нашарлауы мүмкін деген алаңдаушылық пайда болды. Соның салдарынан осы салаға жұмсалатын күрделі қаржының көлемі мен жасанды интеллект технологияларына негізделген бизнестің табыстылығына қатысты күмән күшейді», – деді Nomura сарапшысы Ватару Акияма.
Мәскеу уақытымен сағат 8:26-да Жапонияның Nikkei 225 индексі 4,5 пайызға төмендеді. Осылайша индекс қатарынан алтыншы сауда сессиясында құлдырап отыр.
Микрочиптерді сынақтан өткізуге арналған жабдық өндіретін Advantest компаниясының акциялары 13,7 пайызға, чип өндірісіне қажетті жабдық шығаратын Tokyo Electron акциялары 6,3 пайызға арзандады. Инвестициялық және технологиялық SoftBank Group компаниясының бағалы қағаздары 8,8 пайызға, микрочип өндіруші Kioxia акциялары 10,5 пайызға төмендеді. Ал жартылай өткізгіштер өндірісіне қажетті құрамдас бөлшектер шығаратын Sumco Corp. және Lasertec Corp. компанияларының акциялары тиісінше 12,3 және 11,5 пайызға құнсызданды.
Қаржы секторындағы компаниялардың да акциялары арзандады. Атап айтқанда, Mizuho Financial Group бағалы қағаздары 2 пайызға, Sumitomo Mitsui Financial Group пен Mitsubishi UFJ Financial Group акциялары 1,2 пайызға төмендеді.
Ал фармацевтика саласындағы Sumitomo Pharma және Takeda Pharmaceutical Co. компанияларының акциялары тиісінше 15 және 4 пайызға қымбаттады. Сауда желілеріне иелік ететін Fast Retailing пен Seven & I Holdings компанияларының бағалы қағаздары 0,2 және 1,1 пайызға өсті.
Сондай-ақ электроника өндіруші Sony акциялары 0,2 пайызға, косметика шығаратын Shiseido акциялары 0,9 пайызға, ал Toyota мен Honda автоконцерндерінің бағалы қағаздары тиісінше 0,5 және 0,4 пайызға қымбаттады.
Мәскеу уақытымен сағат 8:37-де Қытайдың Shanghai Composite индексі 2,4 пайызға, Гонконгтың Hang Seng индексі 1,5 пайызға төмендеді.
Hang Seng индексіне кіретін компаниялар арасында компьютер өндіруші Lenovo мен микрочип шығаратын Hua Hong Grace Semiconductor акциялары ең көп арзандады. Олардың құны тиісінше 13,6 және 8,6 пайызға құлдырады.
Түсті металл өндіретін Aluminum Corp. of China, CMOC және China Hongqiao Group компанияларының акциялары тиісінше 7,3, 7 және 5,9 пайызға төмендеді. Аккумулятор өндіруші CATL бағалы қағаздары 7,3 пайызға, интернет-компания Baidu Inc. акциялары 4,2 пайызға, ал мұнай өндіретін PetroChina Co. мен CNOOC акциялары тиісінше 2,8 және 2,7 пайызға арзандады.
Сонымен бірге BeOne Medicines және Hansoh Pharmaceutical Group фармацевтикалық компанияларының акциялары тиісінше 2,6 және 2,3 пайызға қымбаттады. Тұрмыстық электроника өндіруші Xiaomi акциялары 2,3 пайызға, ал сыра өндіретін Budweiser Brewing Co. APAC Ltd компаниясының бағалы қағаздары 1,5 пайызға өсті.
Оңтүстік Кореяның Kospi индексі Мәскеу уақытымен сағат 8:21-де 7,6 пайызға құлдырады. Индекс қатарынан жетінші сауда күнінде төмендеп, шілде айының соңынан бергі ең төменгі деңгейге түсті.
Әлемдегі ең ірі микрочип және смартфон өндірушілердің бірі Samsung Electronics компаниясының акциялары 8,4 пайызға, тағы бір чип өндіруші SK Hynix акциялары 9,9 пайызға арзандады.
Түсті металл өндіретін Korea Zinc компаниясының бағалы қағаздары 5,1 пайызға, болат өндіруші Posco акциялары 4,2 пайызға, Hyundai Motor автоконцернінің акциялары 5,9 пайызға төмендеді. Аккумулятор шығаратын LG Energy Solution компаниясының акциялары 3,4 пайызға, ал KB Financial Group бағалы қағаздары 0,9 пайызға құнсызданды.
Аустралияның S&P/ASX 200 индексі бір күнде 0,1 пайызға төмендеді.
Елдің статистика басқармасының мәліметінше, қыркүйекте Аустралиядағы жұмыссыздық деңгейі тамыз айындағы көрсеткіштен өзгермей, 4,7 пайыз болды. Бұл – 2021 жылғы қазаннан бергі ең жоғары көрсеткіш.
Жұмыссыздар саны 8,9 мың адамға көбейіп, 732 мыңға жетті. Мұндай көрсеткіш соңғы рет 2021 жылғы сәуірде тіркелген. Ал жұмыспен қамтылғандар саны 39,3 мың адамға азайып, 14,78 миллионға дейін қысқарды.
Әлемдегі ең ірі тау-кен өндіруші компаниялардың қатарындағы BHP мен Rio Tinto-ның нарықтық құны тиісінше 4,6 және 4,1 пайызға төмендеді.
Ал Аустралияның ірі банктерінің акциялары қымбаттады. Атап айтқанда, ANZ бағалы қағаздары 2,3 пайызға, Commonwealth Bank of Australia акциялары 3,1 пайызға, National Australia Bank акциялары 2,9 пайызға, Westpac Banking акциялары 3,1 пайызға, ал Suncorp акциялары 2,4 пайызға өсті.
